Rajasthan: పెట్రోల్‌ ట్యాంకర్‌లో మద్యం అక్రమ రవాణా..!

జైపుర్‌: ఎవరికీ అనుమానం రాకుండా పెట్రోల్‌ ట్యాంకర్‌లో మద్యాన్ని దాచి అక్రమంగా రవాణా చేసేందుకు యత్నించిన నిందితులను పోలీసులు పట్టుకున్నారు. రాజస్థాన్‌(Rajasthan)లో ఈ ఘటన వెలుగుచూసింది. పోలీసుల వివరాల ప్రకారం.. ఇద్దరు నిందితులు ఓ పెట్రోల్‌ ట్యాంకర్‌లో 610 డబ్బాల అక్రమ మద్యాన్ని(Illicit Liquor) దాచి, పంజాబ్‌లోని లూథియానా నుంచి గుజరాత్‌(Gujarat)కు తరలించేందుకు బయల్దేరారు. మార్గమధ్యలోని రాజస్థాన్‌ పోలీసులకు ఈ విషయమై పక్కా సమాచారం అందింది.

ఈ మేరకు శనివారం ఓ పోలీసు బృందం ఇక్కడి చురు జిల్లాలో గుజరాత్ రిజిస్ట్రేషన్ నంబర్ గల ట్యాంకర్‌ను ఆపి తనిఖీ చేయగా.. మొత్తం 610 మద్యం డబ్బాలు లభ్యమయ్యాయి. ఈ ఘటనలో బాబూలాల్ జాట్, రేవంత్ కుమార్‌లను అరెస్టు చేసినట్లు పోలీసులు చెప్పారు. వాహనంతోపాటు మద్యాన్ని స్వాధీనం చేసుకున్నట్లు వెల్లడించారు. పట్టుబడిన మద్యం విలువ రూ.60 లక్షలు ఉంటుందని తెలిపారు. ఈ వ్యవహారం వెనుక ఎవరెవరున్నారో తేల్చేందుకు నిందితులను పూర్తి స్థాయిలో విచారిస్తున్నట్లు చెప్పారు.