Hyderabad News: బాలికపై లైంగిక దాడి.. హోంగార్డుకు 30 ఏళ్ల జైలు శిక్ష

హైదరాబాద్: దివ్యాంగురాలైన మైనర్‌ బాలికపై లైంగిక దాడి కేసులో హోంగార్డుకు నాంపల్లి న్యాయస్థానం 30 ఏళ్ల కఠిన కారాగార శిక్ష విధిస్తూ తీర్పు వెల్లడించింది. సీసీఎస్‌లో హోంగార్డుగా పనిచేస్తున్న మల్లికార్జున్ గత ఏడాది అక్టోబరులో హైదరాబాద్‌లోని తుకారంగేట్‌ ప్రాంతంలో నివసించే మైనర్‌ బాలిక ఇంట్లోకి చొరబడి లైంగిక దాడి చేశాడు. రెండు సార్లు లైంగిక దాడి చేసిన హోంగార్డు మల్లికార్జున్‌ .. విషయం బయటకు చెబితే తీవ్ర పరిణామాలుంటాయని బాలికను బెదిరించాడు. అనంతరం 5నెలల తర్వాత బాలిక గర్భం దాల్చడంతో లైంగిక దాడి విషయం వెలుగులోకి వచ్చింది. దీంతో బాధితురాలు ఈ ఏడాది ఫిబ్రవరిలో పోలీసులను ఆశ్రయించారు. దర్యాప్తు చేపట్టిన పోలీసులు మల్లికార్జున్‌ను అరెస్టు చేశారు. నిందితుడు లైంగిక దాడికి పాల్పడినట్టు నేరం రుజువుకావడంతో 30 ఏళ్ల కఠిన కారాగార శిక్ష విధిస్తూ నాంపల్లి న్యాయస్థానం తీర్పు వెలువరించింది. దోషికి రూ.50 వేలు జరిమానా విధించిన కోర్టు.. అందులో నుంచి రూ.40 వేలు బాధితురాలికి చెల్లించాలని ఆదేశించింది.