‘నగ్న చిత్రాలు పంపండి’ అంటూ అమ్మాయిలకు బెదిరింపులు.. యువకుడి అరెస్టు

హైదరాబాద్‌: ఇన్‌స్టాగ్రామ్‌లో యువతులను మోసం చేస్తున్న అజయ్‌ అనే యువకుడిని పోలీసులు అరెస్టు చేశారు. ఇన్‌స్టాగ్రామ్‌లో యువతి ప్రొఫైల్‌ ఫొటోతో ఖాతా తెరిచిన అజయ్.. అమ్మాయిగా పరిచయం చేసుకొని మోసాలకు పాల్పడినట్లు తేలింది. యువకుడిని అమ్మాయిగా భావించిన యువతులు వారి ఫొటోలను పంపించారు. ఫొటోలతో అజయ్‌ వారిని బ్లాక్‌మెయిల్‌ చేయడం ప్రారంభించాడు. వారి నగ్న చిత్రాలు పంపించకపోతే మార్ఫింగ్‌ చేస్తానని.. కోరిక తీర్చకపోతే మార్ఫింగ్‌ చేసిన చిత్రాలను యూట్యూబ్‌లో అప్‌లోడ్‌ చేస్తానని బెదిరింపులకు పాల్పడ్డాడు. ఈ మేరకు 15 రోజుల క్రితం అజయ్‌పై సైబర్‌ క్రైం పోలీసులకు నగరానికి చెందిన యువతి ఫిర్యాదు చేశారు. కేసు నమోదు చేసి దర్యాప్తు చేపట్టిన పోలీసులు దిల్‌సుఖ్‌నగర్‌లో అజయ్‌ని అరెస్టు చేశారు. నిందితుడు అజయ్‌ వరంగల్‌ జిల్లా పరకాల వాసిగా పోలీసులు గుర్తించారు. అజయ్‌ హైదరాబాద్‌లో మల్టీమీడియా కోర్సు చేస్తున్నాడు. అజయ్‌ ఇప్పటివరకు చాలా మంది యువతులను బ్లాక్‌మెయిల్‌ చేసినట్లు పోలీసుల విచారణలో తేలింది.