Crime news: మాట్లాడటం మానేసిందని.. స్క్రూడ్రైవర్‌తో 51 సార్లు పొడిచి!

రాయ్‌పూర్: ఛత్తీస్‌గఢ్‌(Chhattisgarh)లో ఒళ్లు గగుర్పొడిచే హత్యాఘటన వెలుగులోకి వచ్చింది. తనతో మాట్లాడేందుకు నిరాకరించిన ఓ యువతిని స్క్రూడ్రైవర్‌తో 51 సార్లు పొడిచి హతమార్చాడో నిందితుడు. ఇక్కడి కోర్బా(Korba) జిల్లాలో ఈ దారుణం చోటుచేసుకుంది. పోలీసుల వివరాల ప్రకారం.. స్థానికంగా నివసించే ఓ యువతి(20)కి, జశ్‌పూర్ జిల్లాకు చెందిన నిందితుడితో మూడేళ్ల క్రితం పరిచయం ఏర్పడింది. అప్పట్లో అతను కండక్టర్‌గా పనిచేస్తున్న బస్సులో ఆమె ప్రయాణించేది. అనంతరం, అతను పని కోసం గుజరాత్‌లోని అహ్మదాబాద్‌కు వెళ్లాడు. ఆ సమయంలో ఇద్దరూ ఫోన్‌లో మాట్లాడుకునేవారు.

కొన్నాళ్లకు ఆమె అతనితో మాట్లాడటం మానేసింది. దీంతో వేధింపులు మొదలుపెట్టాడు. యువతి తల్లిదండ్రులనూ బెదిరించాడు. ఈ క్రమంలోనే.. డిసెంబరు 24న యువతి ఇంటికి చేరుకున్నాడు. ఆ సమయంలో ఆమె ఇంట్లో ఒంటరిగా ఉంది. ఇదే అదనుగా.. ఆమె అరిచేందుకు వీలు లేకుండా నోటిని దిండుతో మూసేసి, స్క్రూడ్రైవర్‌తో 51 సార్లు పొడిచి, పారిపోయాడు. మృతురాలి సోదరుడు ఇంటికి వచ్చి చూసేసరికి రక్తపు మడుగులో నిర్జీవంగా కనిపించింది. కుటుంబ సభ్యుల ఫిర్యాదు మేరకు కేసు నమోదు చేశామని, పరారీలో ఉన్న నిందితుడిని పట్టుకునేందుకు నాలుగు బృందాలను ఏర్పాటు చేసినట్లు పోలీసులు తెలిపారు.