జీవో నం 3 రద్దుతో తీవ్ర నష్టం

చింతపల్లిలో మాట్లాడుతున్న గిరిజన ఉద్యోగుల సంఘం రాష్ట్ర ఉపాధ్యక్షుడు రామకృష్ణ తదితరులు

చింతపల్లి గ్రామీణం, న్యూస్‌టుడే: సార్వత్రిక ఎన్నికల్లో ఎంపీ, ఎమ్మెల్యేలుగా పోటీ చేస్తున్న ఆదివాసీ అభ్యర్థులు గిరిజన చట్టాలు, హక్కులపై తమ వైఖరి తెలియజేయాలని గిరిజన ఉద్యోగుల సంఘం రాష్ట్ర ఉపాధ్యక్షుడు లోచలి రామకృష్ణ డిమాండ్‌ చేశారు. సోమవారం సంఘం రాష్ట్ర కార్యనిర్వాహక కార్యదర్శి యూవీ గిరితో కలిసి స్థానిక గిరిజన ఉద్యోగ భవనం వద్ద మాట్లాడారు. అన్ని రాజకీయ పార్టీలు గిరిజన చట్టాలు, హక్కులు అమలయ్యే విధంగా కృషి చేయాలని కోరారు. జీవో నంబరు 3 రద్దుతో చదువుకున్న గిరి యువత ఉద్యోగం, ఉపాధి లేక గంజాయి,  తదితర వ్యసనాలకు బానిసలవుతున్నారని ఆవేదన వ్యక్తం చేశారు. ఆదివాసీ ప్రజలు గిరిజన చట్టాలను రక్షించే వారికే మద్దతు తెలపాలని సూచించారు. సీపీఎస్‌ జిల్లా ప్రధాన కార్యదర్శి కుడుముల వెంకటరమణ, మండల గౌరవ అధ్యక్షుడు శశికుమార్‌, బౌడ గంగరాజు తదితరులు పాల్గొన్నారు.