62 కేజీల గంజాయి పట్టివేత

పట్టుబడిన గంజాయి, నిందితులతో పోలీసులు

మోతుగూడెం, న్యూస్‌టుడే: రెండు వేర్వేరు కేసుల్లో రూ.3.10 లక్షల విలువైన 62 కేజీల గంజాయిని పట్టుకుని నలుగురు నిందితులను అరెస్టు చేసినట్లు డొంకరాయి పోలీసు స్టేషన్‌ ఎస్సై శివకుమార్‌ తెలిపారు. ఆయన తెలిపిన వివరాలు ఇలా ఉన్నాయి. వై.రామవరం డిప్యూటీ తహసీల్దార్‌ సుధాకరరావు, వీఆర్వో సందీపాచార్యులు సమక్షంలో తన సిబ్బందితో పోలీసు స్టేషన్‌ చెక్‌పోస్టు వద్ద బుధవారం వాహన తనిఖీలు చేసినప్పుడు గంజాయి పట్టుబడిందన్నారు. తొలుత ఎన్టీఆర్‌ జిల్లా కంచికచర్లకు చెందిన పెనుమల బాబు, పర్వతం సురేష్‌ను అరెస్టు చేసి రూ.పది వేల విలువైన రెండు కేజీల గంజాయి, ద్విచక్ర వాహనాన్ని స్వాధీనం చేసుకున్నారు. ఆ తర్వాత వై.రామవరం మండలం బొడ్డగండి పంచాయతీలోని బర్రిగూడ గ్రామానికి చెందిన కిలో రాందాస్‌, తెలంగాణ రాష్ట్రం చిట్యాలకి చెందిన గొర్రె కృష్ణలను అరెస్టు చేసి రూ. 3 లక్షల విలువైన 60 కేజీల గంజాయి, ఆటోను సీజ్‌ చేశారు. నిందితులను రంపచోడవరం కోర్టుకు తరలించామన్నారు. ఈ రెండు కేసుల్లో గంజాయి అక్రమ రవాణాపై ముందస్తు సమాచారం సేకరించి, నిందితులను చాకచక్యంగా పట్టుకోవడంలో కీలకపాత్ర పోషించిన హెడ్‌ కానిస్టేబుళ్లు కల్యాణ్‌, శ్రీనివాసరావు, ఆర్‌.శ్రీనివాస్‌ గౌడ్‌, కానిస్టేబుళ్లు పోసయ్య, గంగరాజులను అదనపు ఎస్పీ రాహుల్‌ మీనా, సీఐ గజేంద్ర కుమార్‌, ఎస్సై శివకుమార్‌ అభినందించారు.