వాగులో పడిన ప్రధానోపాధ్యాయుడు

కాపాడిన స్థానికులు

వాగులో చిక్కుకున్న ఆదాం

పల్లంపల్లి(వీరులపాడు), న్యూస్‌టుడే : ద్విచక్ర వాహనంపై వెళుతున్న వ్యక్తి ప్రమాదవశాత్తు వాగులో పడిన ఘటన మండలంలోని పల్లంపల్లి సమీపంలోని వైరా-కట్టలేరు వాగు వద్ద చోటు చేసుకుంది. స్థానికులు తెలిపిన సమాచారం మేరకు...ఎన్టీఆర్‌ జిల్లా విసన్నపేటకు చెందిన ఎం.ఆదాం మండలంలోని జయంతి ఎంపీపీ(దళితవాడ) పాఠశాలలో ఎల్‌.ఎఫ్‌.ఎల్‌ ప్రధానోపాధ్యాయుడిగా విధులు నిర్వహిస్తున్నారు. సోమవారం మధ్యాహ్నం పాఠశాలలో విధులు ముగించుకున్న అనంతరం నందిగామలో నివాసముంటున్న తన కూతురిని చూడడానికి ద్విచక్ర వాహనం(రాయల్‌ ఎన్‌ఫీల్డ్‌)పై వెళుతుండగా పల్లంపల్లి సమీపంలోని వైరా-కట్టలేరు వాగు వద్ద చప్టాపై ప్రవహిస్తున్న వరద నీటిలో ద్విచక్ర వాహనం అదుపు తప్పింది. వాహనంతో పాటు వరద నీటిలో కొంత దూరం కొట్టుకుపోయిన ఆదాం చప్టా పక్కనే నిర్మించిన వంతెన పిల్లరును పట్టుకొని నిలబడ్డారు. ప్రమాదాన్ని గమనించిన స్థానికులు వెంటనే స్పందించి తాడు సహాయంతో ఆయనను రక్షించి సురక్షితంగా ఒడ్డుకు చేర్చారు.  ద్విచక్ర వాహనం వెలికి తీయడం సాధ్యం కాలేదు. చప్టా పూర్తిగా శిథిల స్థితికి చేరుకుందని, గత ప్రభుత్వంలో వంతెన నిర్మించినప్పటికీ, ప్రస్తుత ప్రభుత్వం అప్రోచ్‌ రహదారిని నాలుగు సంవత్సరాలుగా పూర్తి చేయలేకపోయిందని స్థానికులు ఆరోపిస్తున్నారు. వర్షాకాలంలో ఈ చప్టాపై ప్రమాదాలు నిత్యకృత్యంగా మారినప్పటికీ ప్రభుత్వం ఏ మాత్రం స్పందించడం లేదని వాపోతున్నారు.

తాడు సహాయంతో తీసుకొస్తున్న యువకులు