సారూ.. బిల్లులిచ్చి ఆదుకోండి!

హెల్త్‌క్లినిక్‌ ఎదుట ఆవేదన వ్యక్తం చేస్తున్న గుత్తేదారు

పాలసముద్రం, న్యూస్‌టుడే: హెల్త్‌క్లినిక్‌, డిజిటల్‌ లైబ్రరీ భవనాలు నిర్మించి ఏడాది అవుతున్నా నేటికీ రూపాయి బిల్లులు అందలేదని బిల్లులు అందించి ఆదుకోవాలని గుత్తేదారు వెంకటనరసింహారాజు ఆవేదన వ్యక్తం చేశారు. శుక్రవారం మండలంలోని నరసింహాపురం సచివాలయ పరిధిలో గతేడాది చేపట్టిన పనుల్లో హెల్త్‌ క్లినిక్‌ 80 శాతం, డిజిటల్‌ లైబ్రరీ 30 శాతం పూర్తయినా బిల్లులు రాలేదని వాపోయారు. అప్పు చేసి పెట్టుబడి పెట్టానని.. వాటిని ఇప్పుడు చెల్లించలేక అవమానం పాలయ్యానన్నారు. కనీసం వడ్డీ కట్టలేక పోతున్నానన్నారు. బిల్లులపై డీఈఈ, ఈఈలకు వినతిపత్రాలు అందించినా ఫలితం లేదని, అధికారులను అడిగితే.. నేడురేపంటూ కాలం గడుపుతున్నారని, ఇప్పటివరకు రూ.16 లక్షలు రావాల్సి ఉందని చెప్పారు. అధికారులు స్పందించి తనకు బిల్లులు ఇవ్వాలని ఆయన కోరారు.