మోటారు సైకిల్‌దొంగలతో పోలీసులు

రావులపాలెం పట్టణం: వ్యసనాలకు బానిసలైన ముగ్గురు వ్యక్తులు విలాసాల కోసం మోటారు సైకిల్‌ దొంగలుగా మారి చివరకు పోలీసులకు చిక్కారు. రావులపాలెం పోలీసు స్టేషన్‌లో ఎస్సై భానుప్రసాద్‌ ఆధ్వర్యంలో బుధవారం జరిగిన విలేకరుల సమావేశంలో ఇన్‌ఛార్జి సీఐ బాజీలాల్‌ మాట్లాడుతూ.. రావులపాలెం, ఆలమూరు, కొత్తపేట, అంగర, మలికిపురం పోలీసు స్టేషన్‌ల పరిధిలో 16 మోటారు సైకిల్‌ దొంగతనాలపై కేసులు నమోదవగా, దర్యాప్తులో ముగ్గురు ఉన్నట్లు గుర్తించామన్నారు. ఆలమూరు మండలం పెదపల్లకు చెందిన కంచెర్ల జార్జిటెన్ని, ఆలమూరుకు చెందిన గండేటి నరసింహ, రావులపాలెం మండలం వెదిరేశ్వరానికి చెందిన ఇళ్ల శ్రీనివాస్‌ కొన్ని సంవత్సరాలుగా చోరీలు చేస్తున్నారన్నారు. స్థానిక జూనియర్‌ కళాశాల వద్ద వాహనాల తనిఖీ చేస్తుండగా వీరిని అరెస్టు చేసినట్లు తెలిపారు. వీరి నుంచి 16 మోటారు సైకిళ్లను స్వాధీనం చేసుకున్నట్లు చెప్పారు. వీరిని రిమాండు నిమిత్తం కొత్తపేట కోర్టుకు తరలించినట్లు ఆయన పేర్కొన్నారు.