పేపరుమిల్లు యాజమాన్యం మొండి వైఖరి విడనాడాలి

మాట్లాడుతున్న అరుణ్‌ తదితరులు

దేవీచౌక్‌: రాజమహేంద్రవరం పేపరుమిల్లు యాజమాన్యం మొండివైఖరి విడనాడి వేతన ఒప్పందం వెంటనే అమలు చేయాలని సీఐటీయూ జిల్లా ఉపాధ్యక్షుడు టి.అరుణ్‌ డిమాండ్‌ చేశారు. బుధవారం ప్రెస్‌క్లబ్‌లో మిల్లు కార్మిక సంఘాలతో విలేకరుల సమావేశంలో ఆయన మాట్లాడుతూ కార్మికుల సమ్మె 17వ రోజుకు చేరుకుందన్నారు. రెండేళ్లకోసారి కార్మిక సంఘాల గుర్తింపు ఎన్నికలు, మూడున్నరేళ్లకోసారి వేతన ఒప్పందం చేసుకోవాల్సి ఉండగా గత 42 నెలలుగా పూర్తి భిన్నంగా వ్యవహరించిందని ధ్వజమెత్తారు. చివరి వేతన ఒప్పందం 2020 జూన్‌లో ముగిసినప్పటికీ ఇప్పటివరకు మళ్లీ చేయలేదన్నారు. ఈ నెల 12న జరిగిన చర్చల్లోనూ మొండిగా వ్యవహరించిదన్నారు. కార్మిక సంఘాల జేఏసీ జిల్లా కలెక్టరుకు విన్నవించుకోగా యాజమాన్యాన్ని చర్చలకు పిలిచారని, దానికి కూడా హాజరు కాలేదన్నారు. వేతన ఒప్పందం చేయాలని విజ్ఞప్తి చేశారు. ఐఎన్‌టీయూసీ అధ్యక్షుడు జె.వై.దాసు, సీఐటీయూ అధ్యక్షుడు వెంకటేశ్వరరావు, ఏఐటీయూసీ కార్యదర్శి కృష్ణ, రాజేష్‌, మురళి, సుబ్రహ్మణ్యనాయుడు, సత్తిరాజు, శ్రీనివాసరెడ్డి, వీరబాబు, హరిబాబు, శ్రీను తదితరులు పాల్గొన్నారు.