HyderabadNews: మీరు అపార్ట్‌మెంట్‌ వాసులా?.. ఇది మీ కోసమే!

నమోదుకు రెండు రోజులే గడువు

ఈనాడు, హైదరాబాద్‌: మీరు అపార్ట్‌మెంటు వాసులా.. ఇంకా ఉచిత తాగునీటి పథకం కోసం నమోదు చేసుకోలేదా.. త్వరపడండి. మొత్తం ఫ్లాట్లలో 50-60 శాతం యజమానులు నమోదు చేసుకున్నా.. ఆ అపార్ట్‌మెంట్‌కు ఉచిత తాగునీటి సౌకర్యం పొందే వెసులుబాటు ఉంది. డిసెంబరు 31తో గడువు ముగుస్తున్న దృష్ట్యా వెంటనే నల్లా వినియోగదారుడి సంఖ్య(క్యాన్‌), ఆధార్‌ నంబరుతో అనుసంధానం చేసుకోవాలని అధికారులు సూచిస్తున్నారు. వివిధ కారణాలతో ఇప్పటికీ అనుసంధానం చేసుకోని ఫ్లాట్ల యజమానులకు ఇది సువర్ణావకాశమని పేర్కొంటున్నారు.

అద్దెదారులకూ ఉచితమే

భాగ్యనగరంలో చాలామంది యజమానులు అద్దెతోపాటు నీటి ఛార్జీలు ప్రత్యేకంగా వసూలు చేస్తుంటారు. ఇలాంటి వారిని పరిగణనలోకి తీసుకున్న ప్రభుత్వం వెసులుబాటు కల్పించింది. యజమానితో సంబంధం లేకుండా అద్దెదారు ఆధార్‌ కార్డుతో అనుసంధానమైతే ఆ ఇంటికి ఉచిత నీటిని పొందే వీలు ఉంది. ఆధార్‌ అనుసంధానం చేసినా ఆ వ్యక్తికి ఇంటిపై హక్కులు ఉండవని అధికారులు స్పష్టం చేశారు.

పరిస్థితి ఇది లబ్ధిపొందే నల్లాలు 9,84,023

అనుసంధానమైనవి 4,91,000

కావాల్సినవి 4,93,023