విద్యుత్తు రంగంలో తెలంగాణదే మొదటి స్థానం: సీఎండీ ప్రభాకర్‌రావు

ఖైరతాబాద్‌: విద్యుత్తు పంపిణీలో దేశంలోనే తెలంగాణ మొదటి స్థానంలో ఉందని ట్రాన్స్‌కో, జెన్‌కో సీఎండీ దేవులపల్లి ప్రభాకర్‌రావు పేర్కొన్నారు. గురువారం ఉదయం మింట్‌కాంపౌండ్‌లో రాష్ట్ర విద్యుత్తు అకౌంట్స్‌ ఆఫీసర్స్‌ అసోసియేషన్‌ (టీఎస్‌ఈఏఓఏ) నూతన భవన నిర్మాణానికి ఎస్పీడీసీఎల్‌ సీఎండీ జి.రఘుమారెడ్డి, ట్రాన్స్‌కో జేఎండీ శ్రీనివాసరావు తదితరులతో కలిసి సీఎండీ భూమి పూజ చేశారు. ఆయన మాట్లాడుతూ.. మీటరు అమ్మకాలు పెంచడంతో పాటు సాంకేతికతను మెరుగుపర్చుకోవడం ద్వారా ఆర్థికాభివృద్ధి సాధించే అవకాశం ఉందని, అప్పుడే సంస్థలు అభివృద్ధి పథంలో నడుస్తాయన్నారు. ఉత్పత్తి, పంపిణీలో ముందున్నామని,  ఆర్థికంగానూ ముందుకు వెళ్లాలన్నారు. టీఎస్‌ ఎస్పీడీసీఎల్‌ సీఎండీ జి.రఘుమారెడ్డి మాట్లాడుతూ..  వచ్చే ఏడాది ఈ రోజు నాటికి నూతన భవనం ప్రారంభోత్సవం జరగాలని ఆకాంక్షించారు. టీఎస్‌ఈఏఓఏ ప్రధాన కార్యదర్శి పి.అంజయ్య మాట్లాడుతూ.. సీఎం కేసీఆర్‌ దిశా నిర్దేశం, మంత్రి జగదీశ్‌రెడ్డి, సీఎండీ ప్రభాకర్‌రావు నిరంతర కృషి ఫలితంగా సంస్థలు మంచి ఫలితాలుసాధిస్తున్నాయన్నారు. సంస్థ సీఎఫ్‌ఓ అనూరాధ, సీజీఎంలు, టీఎస్‌ఈఏఓఏ అధ్యక్షుడు అశోక్‌, షరీఫ్‌, శ్యామలరావు పాల్గొన్నారు.