25 శాతం పూర్తయిన దక్కన్‌ మాల్‌ కూల్చివేత పనులు

రెజిమెంటల్‌ బజార్‌: సికింద్రాబాద్‌ మినిస్టర్‌ రోడ్డులో అగ్ని ప్రమాదానికి గురైన దక్కన్‌ మాల్‌ కూల్చివేత పనులు వేగవంతంగా సాగుతున్నాయి. ఈ నెల 19న దక్కన్‌ మాల్‌లో అగ్నిప్రమాదం చోటుచేసుకున్న విషయం తెలిసిందే. భారీ అగ్ని ప్రమాదం సంభవిచండంతో ఈ భవనం నాణ్యత లోపించడం కారణంగా దీన్ని కూల్చివేయాలని అధికారులు నిర్ణయించారు. ఇందులో భాగంగా మాల్‌కు మాలిక్‌ ట్రేడింగ్‌ అండ్‌ డిమాలిషన్ సంస్థకు కాంట్రాక్టు దక్కడంతో గురువారం రాత్రి 11 గంటల నుంచి కూల్చివేతను ప్రారంభించింది. శనివారం ఉదయం వరకు 25 శాతం మేర కూల్చివేత పనులు జరిగాయని సంస్థ ప్రతినిధులు తెలిపారు. ఈ పనులను మరింత వేగవంతంగా పూర్తి చేస్తామని, చుట్టు పక్కల వారికి ఎలాంటి ఇబ్బందులు కలగకుండా కొనసాగిస్తామని అధికారులు తెలిపారు.