మహిళలు లేనిచోటుకు అతడిని బదిలీ చేయండి

ఈనాడు, హైదరాబాద్‌: మహిళా ఉద్యోగినిపై వేధింపులకు పాల్పడిన ఎగ్జిక్యూటివ్‌ ఇంజినీర్‌ ఆర్‌.మోహన్‌సింగ్‌పై చర్యలు తీసుకోవాలంటూ బల్దియా కమిషనర్‌ లోకేష్‌కుమార్‌.. పబ్లిక్‌హెల్త్‌ అండ్‌ మున్సిపల్‌శాఖ ఇంజినీర్‌ ఇన్‌ చీఫ్‌కు లేఖ రాశారు. అతడిని జీహెచ్‌ఎంసీ నుంచి తొలగించి ప్రాధాన్యం లేని, మహిళల సహచర్యం లేని పోస్టుకు బదిలీ చేయాలంటూ కోరడం చర్చనీయాంశమైంది. కమిషనర్‌ లేఖ ఆలస్యంగా వెలుగులోకి వచ్చింది. బల్దియాలో ఎగ్జిక్యూటివ్‌ ఇంజినీర్‌ ఆర్‌.మోహన్‌సింగ్‌ తనను వేధిస్తున్నాడంటూ డిప్యూటీ ఎగ్జిక్యూటివ్‌ ఇంజినీర్‌గా పనిచేస్తున్న కె.లావణ్య ఇంటర్నల్‌ కంప్లయింట్‌ కమిటీకి ఫిర్యాదు చేసింది. కమిటీ దీనిపై విచారించగా.. సంబంధిత ఆరోపణలు వాస్తవాలేనని నిర్ధారిస్తూ నివేదిక ఇచ్చింది. ఈ రిపోర్టును కమిషనర్‌కు పంపగా.. దాన్ని జత చేస్తూ ఆర్‌.మోహన్‌సింగ్‌పై చర్యలు తీసుకోవాలంటూ లోకేశ్‌ కోరారు.