నాలుగేళ్ల బాలుడిపై వీధికుక్కల దాడి

బాలుడి తలపై తీవ్రగాయాలు

కంచన్‌బాగ్‌: ఐదు శునకాలు నాలుగేళ్ల బాలుడిపై  దాడికి పాల్పడ్డాయి.  కంచన్‌బాగ్‌ పరిధిలో జరిగిన ఈ ఘటనలో తీవ్రంగా గాయపడిన బాలుడు ఆసుపత్రిలో చికిత్స పొందుతున్నాడు. కేంద్ర ప్రభుత్వ, రక్షణ మంత్రిత్వ శాఖ ఆధీనంలో డీఆర్‌డీవో టౌన్‌షిప్‌లో ఈ తరహా సంఘటనలు తరచూ చోటుచేసుకుంటున్నాయి.  వివరాల్లోకి వెళితే.. పాతబస్తీ రక్షాపురానికి చెందిన బాలుడు(4) కుటుంబ సభ్యులతో కలిసి ఆదివారం రాత్రి ఓ వేడుకకు హాజరయ్యాడు. టౌన్‌షిప్‌లోని సామాజిక భవనం వెనుక పరిసర ప్రాంతాల్లో ఆడుకుంటున్నాడు. అక్కడే ఉన్న ఐదు కుక్కలు ఒక్కసారిగా బాలుడిపై దాడికి పాల్పడ్డాయి. తల, కడుపు, వీపు, చేతులు, కాళ్లపై దాడి చేసి తీవ్రంగా గాయపర్చాయి. బాలుడు ప్రస్తుతం ఆసుపత్రిలో చికిత్స పొందుతున్నాడు. ప్రతి శనివారం కుక్కలను పట్టుకుని వెళ్తామని చెప్పిన సిబ్బంది ఆ దిశగా చర్యలు తీసుకోవడం లేదని డీఆర్‌డీవో-బీపీఎంఎస్‌ కో-ఆర్డినేషన్‌ హైదరాబాద్‌ కమిటీ ఛైర్మన్‌ మహమ్మద్‌ మేరాజ్‌ అహ్మద్‌ ఆరోపించారు. ఎలాంటి హాని కలగకముందే చర్యలు తీసుకోవాలని డిమాండ్‌ చేస్తున్నారు.