ఠాణాలో నారసింహుడికి పూజలు

 పూజలో పాల్గొన్న పోలీసు కుటుంబ సభ్యులు
ధర్మపురి, న్యూస్‌టుడే : నేరస్తులో, నేర చరితులో, ఫిర్యాదుదారులో, పైరవీకారులో సాధారణంగా ఉండే పోలీసుస్టేషన్‌లో అఖిలాండకోటి బ్రహ్మాండనాయకుడైన శ్రీ లక్ష్మీనరసింహస్వామి పరివార సమేతంగా వెళ్లి పూజలందుకున్నారు. ఈ తంతు రాష్ట్రంలోనే ఎక్కడా లేని విధంగా జగిత్యాల జిల్లా ధర్మపురి బ్రహ్మోత్సవాల్లో ఏటా జరుగుతుంది. ఈ ఉత్సవానికి సంబంధించి దక్షిణ దిగ్యాత్రలో భాగంగా స్థానిక పోలీసుస్టేషన్‌కు స్వామివారిని తీసుకెళ్లి మంగళవారం రాత్రి పూజలు చేశారు. వేలాది మంది భక్తులు వెంటరాగా, సాంస్కృతిక కళాప్రదర్శనలతో, డప్పు వాయిద్యాలతో పురవీధుల నుంచి శోభాయాత్ర నిర్వహించారు. జగిత్యాల డీఎస్పీ రఘుచందర్‌, సీఐ రాంనర్సింహారెడ్డి, పలువురు ఎస్సైలు పోలీసు కుటుంబ సభ్యులతో కలిసి స్వామి వారి సేవను తమ భుజాలపై పెట్టుకుని సాదరంగా ఆహ్వానించి ఠాణాలో స్వామి వారికి పూజలు చేశారు.

రాజన్న హుండీ ఆదాయం రూ.2.21 కోట్లు

 వేములవాడ, న్యూస్‌టుడే: వేములవాడ రాజరాజేశ్వరస్వామి వారి 21 రోజుల హుండీలను మంగళవారం ఆలయ అధికారులు లెక్కించారు. రూ.2,21,29,350ల ఆదాయం సమకూరినట్లు ఆలయ ఈవో కృష్ణ ప్రసాద్‌ తెలిపారు. బంగారం 463 గ్రాములు, వెండి 19.8 కిలోలను భక్తులు సమర్పించినట్లు తెలిపారు.