టిడ్కో ఇళ్లలబ్ధిదారులకు రుణాలు

మాట్లాడుతున్న కలెక్టర్‌ చక్రధర్‌బాబు

నెల్లూరు (కలెక్టరేట్‌), న్యూస్‌టుడే: నెల్లూరు నగరపాలక సంస్థతో పాటు మున్సిపాలిటీల పరిధిలో నిర్మించిన టిడ్కో ఇళ్ల నిర్మాణాలకు సంబంధించిన లబ్ధిదారులకు రుణ మంజూరు ప్రక్రియను త్వరితంగా పూర్తి చేయాలని కలెక్టర్‌ కేవీఎన్‌ చక్రధర్‌బాబు ఆదేశించారు. గురువారం ఆయన తన క్యాంప్‌ కార్యాలయంలో టిడ్కో ఇళ్ల లబ్ధిదారులకు రుణాల మంజూరుపై అధికారులతో సమీక్ష జరిపారు. సంబంధిత డాక్యుమెంటేషన్‌ పూర్తి చేసి.. లబ్ధిదారులకు త్వరగా అందించాలని సూచించారు. సూళ్లూరుపేట, నాయుడుపేట, ఆత్మకూరు, గూడూరు మున్సిపాలిటీల్లో రుణాల మంజూరుపై బ్యాంకర్లు ప్రత్యేక దృష్టి పెట్టాలన్నారు. వారంలోగా రుణాల మంజూరులో పురోగతి కనిపించాలన్నారు. ముద్ర రుణాలను విరివిగా అందించాలని, బ్యాంకులు, ఏటీఎం కేంద్రాల్లో కొవిడ్‌ నిబంధనలు పాటించేలా చర్యలు చేపట్టాలని సూచించారు. సమావేశంలో మెప్మా పీడీ రవీంద్ర, లీడ్‌ బ్యాంకు మేనేజరు వైవీ రామ్‌ప్రసాద్‌రెడ్డి, నగరపాలకసంస్థ అదనపు కమిషనర్‌ ఓబులేసు నందన్‌, టిడ్కో ఈఈ ఉమాశంకర్‌శాస్త్రి, ఆత్మకూరు, కావలి, సూళ్లూరుపేట, నాయుడుపేట, గూడూరు మున్సిపల్‌ కమిషనర్లు రమేష్‌, శివారెడ్డి, నరేంద్ర, చంద్రశేఖర్‌, శ్రీకాంత్‌, వివిధ బ్యాంకుల సమన్వయకర్తలు పాల్గొన్నారు.