206 మంది విద్యార్థులు.. రెండే గదులు

మూత్రశాలకు వెళ్లేందుకు వరుసలో నిల్చున్న చిన్నారులు

ముత్యంపేట హరిజనవాడ ప్రాథమిక పాఠశాల చదువుల్లో ఆదర్శంగా నిలుస్తున్నప్పటికీ వసతులు కల్పించడంలో నిర్లక్ష్యం కొనసాగుతూనే ఉంది. మన ఊరు- మన బడి పథకంలోనూ దీనిపై దయ చూపలేదు. 206 మంది విద్యార్థులుండగా కార్యాలయంతో కలిపి రెండే తరగతి గదులున్నాయి. చిన్నారులు చెట్ల కింద, వరండాలో చదువుకోవాల్సి వస్తోంది. ప్రస్తుతం చలి తీవ్రత పెరగడంతో ఆరుబయట వణుకుతూ కూర్చుంటున్నారు. ఈ పాఠశాల చదువులతోపాటు పచ్చదనం, పరిశుభ్రత విషయంలోనూ రాష్ట్రస్థాయిలో గుర్తింపు తెచ్చుకుంది. ఇద్దరు రెగ్యులర్‌ ఉపాధ్యాయులు, ఒక డిప్యుటేషన్‌ ఉపాధ్యాయురాలు, తల్లిదండ్రులు ఏర్పాటు చేసిన ఇద్దరు వాలంటీర్లు చదువులు చెబుతున్నారు. రెండే మరుగుదొడ్లు ఉండటంతో ఇబ్బందికరంగా మారింది. ఈ ఏడాది జనవరిలో గ్రామంలో పర్యటించిన ప్రభుత్వ విప్‌ గంప గోవర్ధన్‌ పాఠశాలను సందర్శించి విద్యార్థుల సమస్యలు తెలుసుకున్నారు. రెండు అదనపు గదుల నిర్మాణానికి హామీ ఇచ్చారు. ఇప్పటికైనా విద్యార్థుల సంఖ్యకు తగ్గట్టుగా తరగతి గదులు, మరుగుదొడ్లు నిర్మించాలని తల్లిదండ్రులు కోరుతున్నారు.

- న్యూస్‌టుడే, దోమకొండ