పాలకుల నిర్లక్ష్యం.. యువత శ్రమదానం

నీలాదేవిపురం సమీపంలో గుంతలు పూడ్చుతున్న విద్యార్థులు
బూర్జ మండలం నీలాదేవిపురం కూడలి, శ్రీకాకుళం- పాలకొండ ప్రధాన రహదారిలో ఏర్పడిన గుంతలను టీఆర్‌రాజుపేట, సంకురాడకు చెందిన యువత సిమెంటు, పిక్కరాయితో బుధవారం పూడ్చారు. ఈ ప్రదేశంలో నిత్యం  ప్రమాదాలు చోటు చేసుకుంటున్నాయి. ఇటీవల ఈ గుంతల వద్దనే బూర్జ పోలీస్‌ స్టేషన్‌ పరిధిలో విధులు నిర్వహించే కానిస్టేబుల్‌ సురేష్‌ మృతి చెందిన విషయం తెలిసిందే. మంగళవారం రాత్రి శ్రీకాకుళం నుంచి పాలకొండ వైపు వెళ్తున్న రెండు ద్విచక్ర వాహనాలు గుంతలు కారణంగా అదుపు తప్పాయి. దీంతో రెండు వాహనాలు వెనుక కూర్చున్న ఇద్దరు మహిళలు తీవ్ర గాయాల పాలై శ్రీకాకుళంలోని ఒక ప్రైవేటు ఆసుపత్రిలో చికిత్స పొందుతున్నట్లు స్థానికులు తెలిపారు. అయినా పాలకుల్లో ఎలాంటి చలనం లేకపోవడంతో యువత శ్రమదానం చేపట్టారు. వారిని పలువురు అభినందించారు. 

 - న్యూస్‌టుడే, బూర్జ