24 గంటల్లోనే 2244 కొవిడ్‌ కేసులు

రాష్ట్రంలోనే అత్యధికం

విశాఖపట్నం, పాడేరు, రావికమతం, న్యూస్‌టుడే: జిల్లా వ్యాప్తంగా కొవిడ్‌ కేసులు అంతకంతకు పెరుగుతున్నాయి. పరీక్షలు చేయించుకుంటున్న ప్రతి ముగ్గురిలో ఒకరికి పాజిటివ్‌ నిర్ధరణ అవుతోంది. గురువారం ఉదయం నుంచి శుక్రవారం ఉదయం వరకు రాష్ట్రంలో విశాఖ జిల్లాలో అత్యధికంగా 2244 కేసులు నమోదయ్యాయి. ఇదే సమయంలో 5634 మందికి నిర్ధరణ పరీక్షలు చేశారు. పాజిటివిటీ శాతం 39.83శాతంగా నమోదైంది. రాష్ట్ర మంత్రి ముత్తంశెట్టి శ్రీనివాసరావుకు కరోనా నెగిటివ్‌గా తేలింది. రావికమతం తహసీల్దారు కార్యాలయంలో 10 మంది ఉద్యోగులు, మరుపాక మోడల్‌ స్కూలు ప్రిన్సిపల్‌ సహా 21 మంది కరోనా బారినడ్డారు. మన్యంలో తాజాగా 56 కొవిడ్‌ కేసులు నమోదైనట్లు ఏడీఎంహెచ్‌వో లీలాప్రసాద్‌ తెలిపారు. అత్యధికంగా హుకుంపేట ఆసుపత్రి పరిధిలో 33 కేసులు నమోదు కాగా.. మినుములూరు పీహెచ్‌సీ పరిధిలో 13 కేసులు నమోదయ్యాయన్నారు. మూడు రోజుల క్రితం ఐటీడీఏ ఉన్నతాధికారి డ్రైవర్‌కు కొవిడ్‌ పాజిటివ్‌ వచ్చింది. తాజాగా ఆ అధికారికి సైతం పాజిటివ్‌ వచ్చినట్లు సమాచారం.