చిత్ర వార్తలు

‘మా’రింది

బంగ్లాదేశ్‌ నౌక ‘ఎంవీ మా’ దాదాపు ఏడాది కిందట తుపానుకు విశాఖ తీరానికి కొట్టుకొచ్చింది. ఇప్పుడు ఆ నౌక రూపే మారిపోయింది. పర్యాటకంగా అభివృద్ధి చేసే పనులు సాగుతున్నాయి. దీంతో కొత్తగా రంగులు వేసి ముస్తాబు చేశారు.

- ఈనాడు, విశాఖపట్నం

ప్రమాదం... రాళ్ల రూపంలో!!

తీరంలో జోడుగుళ్లపాలెం సమీపంలోని కొండపై నుంచి పడుతున్న రాళ్లు ఈ మార్గంలో ప్రయాణికులను హడలెత్తిస్తున్నాయి. ఈ దారి నిత్యం రద్దీగా ఉంటుంది.  ఉదయం...సాయంత్రం  ఆహ్లాద వాతావరణంలో జనం నడుస్తుంటారు. ఎప్పుడు ఏ రాయి మీదికి దూసుకొచ్చేస్తుందో...ప్రమాదం ఎలా విరుచుకుపడుతుందోనని వారు కలవరపడుతున్నారు.

 - ఈనాడు, విశాఖపట్నం

ఇదో... ప్రయత్నం

గురుద్వారా సమీపంలోని ఏపీఈపీడీసీఎల్‌ కార్యాలయ భవనంలో లిఫ్టు వద్ద ఓ స్పాంజ్‌ ఏర్పాటు చేసి ‘టూత్‌పిక్‌’లను దానికి గుచ్చి ఉంచారు. లిఫ్టు ఎక్కేవారు బటన్లు నొక్కేందుకు వీటిని ఉపయోగించేలా ఇలా ఏర్పాటు చేశారు. కరోనా కట్టడికి ఇదో చిన్న ప్రయత్నమని చెబుతున్నారు.

-ఈనాడు, విశాఖపట్నం

సాగర తీరంలో హరివిల్లు సోయగం

ప్రకృతి ప్రేమికుల మదిని దోచే సముద్ర తీరాన నీలాకాశంలో హరివిల్లు కనువిందు చేసింది. అచ్యుతాపురం మండలం పూడిమడక తీరంలో సోమవారం కనిపించిన ఇంద్రధనుస్సు సందర్శకులు, మత్స్యకారులను ఆకట్టుకుంది. ఈ అద్భుత దృశ్యాన్ని యువకులు సెల్‌ఫోన్లలో బంధించారు.

- అచ్యుతాపురం, న్యూస్‌టుడే

రోలుగుంట మండలం నిండుగొండలో గౌరీపరమేశ్వరుల ఉత్సవ విగ్రహాల నిమజ్జన కార్యక్రమం ఘనంగా జరిగింది. ఆదివారం రాత్రి ప్రారంభమైన ముగింపు సంబరాలు సోమవారం సారె అప్పగింతలతో ముగిశాయి.

- న్యూస్‌టుడే, రోలుగుంట

కంఠవరంలో షూటింగ్‌ సందడి

సొలభం పంచాయతీ కంఠవరం వద్ద మత్స్యగెడ్డలో సోమవారం సినిమా షూటింగ్‌ జరిగింది. నిహారిక బ్యానర్‌పై నిర్మిస్తున్న ఈ చిత్రానికి ఇంకా టైటిల్‌ ఖరారు చేయలేదని డైరెక్టర్‌ మేర్లపాక గాంధీ తెలిపారు. హీరోగా సంతోష్‌బాబు, హీరోయిన్‌గా పైరా నటిస్తున్నారని చెప్పారు. మత్స్యగెడ్డలో నటుడు బ్రహ్మాజీపై పలు సన్నివేశాలు చిత్రీకరించారు.

-జి.మాడుగుల, న్యూస్‌టుడే

చెట్టు కిందే చికిత్స

పనసపుట్టు పంచాయతీలోని కడుతులలో సోమవారం చెట్టు కిందే వైద్య శిబిరం నిర్వహించారు. లబ్బూరు ప్రాథమిక ఆరోగ్య కేంద్రం వైద్యులు, 104 సిబ్బంది ఈ శిబిరాన్ని ఏర్పాటు చేశారు. సీజనల్‌ వ్యాధులు ఎక్కువగా ఉండటంతో గ్రామ వాలంటీరు త్రినాథ్‌, ఆశ కార్యకర్తల సమాచారం మేరకు వైద్యాధికారులు ప్రతాప్‌, ప్రణీత్‌ రోగులకు సేవలు అందించారు. చెట్టు కిందే శిబిరం ఏర్పాటుతో రోగులు, వృద్ధులు ఇబ్బందులు పడ్డారు.

-ముంచంగిపుట్టు, న్యూస్‌టుడే