ఖజానా అధికారులకు టోకరా

అనిశా అధికారులమంటూ ఫోన్లు
రూ.40వేలు ముట్టజెప్పిన ఓ ఎస్టీఓ

వన్‌టౌన్‌, న్యూస్‌టుడే: ఉమ్మడి విశాఖ జిల్లాలో పని చేస్తున్న ఉప, సహాయ ఖజానా (ఎస్టీఓ, ఏటీఓ) అధికారులకు కొంతమంది అనిశా(అవినీతి నిరోధక శాఖ) అధికారులమంటూ ఫోన్లు చేసి బెదిరింపులకు దిగడం చర్చనీయాంశమైంది. ‘విజయవాడలోని అనిశా ప్రధాన కార్యాలయం నుంచి ఫోన్‌ చేస్తున్నాం? మీపై పలు ఫిర్యాదులున్నాయి, ఇంకా మీకు చాలా సర్వీసు ఉంది. ఏదో ఒకటి చేసుకొని కేసులను ముగించుకోండి. లేదంటే ఇళ్లపై దాడులు చేయాల్సి వస్తుంది’ అని నలుగురు ఎస్టీఓలు, ఒక ఏటీఓకు ఫోన్లు వచ్చాయి. అనకాపల్లి జిల్లాలోని ఓ ఎస్టీఓకు ఫోను చేసిన వ్యక్తి రూ.2లక్షలు ఇవ్వాలని డిమాండ్‌ చేయగా.. తన వద్ద అంత డబ్బు లేదని, బ్యాంకు ఖాతాలో రూ.40వేలు ఉందని చెప్పడంతో ఆ మొత్తాన్ని పంపాలని సూచించారు. దీంతో సదరు అధికారి రూ.40వేల నగదు ఫోన్‌పే ద్వారా పంపారు.

* తదుపరి ఆరా తీయగా అవన్నీ నకిలీ కాల్స్‌గా తేలింది. రాష్ట్ర వ్యాప్తంగా పలువురు అధికారులకు ఇలాంటి ఫోన్లు రాగా, కొంత మంది భయపడలేదని, కొందరు భయపడి ఎంతో కొంత ముట్టజెప్పినట్లు సమాచారం. పైకి మాత్రం ఖజానా శాఖ అధికారులెవరూ ఈ విషయమై మాట్లాడడం లేదు. ఫిర్యాదులూ చేయడం లేదు.