కోతలతో కోలుకోలేనంత నష్టం

రొయ్యల రైతుల ఆందోళన

ఆకివీడు, న్యూస్‌టుడే: వేళాపాళా లేకుండా గంటల తరబడి విధిస్తున్న విద్యుత్తు కోతలతో కోలుకోలేని స్థాయిలో నష్టపోతున్నామంటూ రొయ్యల సాగుదారులు ఆందోళన బాటపట్టారు. ధర్మాపురం అగ్రహారం ప్రాంతానికి చెందిన రొయ్యల సాగుదారులు, పలువురు వైకాపా నాయకులు ఆకివీడులో విద్యుత్తు ఉప కేంద్రం వద్ద శుక్రవారం నిరసన తెలిపారు. సుమారు 10 గంటల నుంచి విద్యుత్తు సరఫరా సక్రమంగా లేకపోవడంతో చెరువుల్లో ప్రాణవాయువు సమస్య ఉత్పన్నమై టన్నుల కొద్ది రొయ్యలు చనిపోయాయని పలువురు రైతులు ఏఈ ప్రసాద్‌రాజుకు చెప్పారు. సమస్యను పరిష్కరించి నాణ్యమైన విద్యుత్తును నిరంతరం సరఫరా చేయాలని.. లేకుంటే ఆందోళనను తీవ్రతరం చేస్తామని హెచ్చరించారు. అనంతరం ఏఈకి వినతిపత్రం అందజేశారు. కార్యక్రమంలో వైకాపా కౌన్సిలర్లు కె.జాన్‌వెస్లీ, పడాల శ్రీనివాసరెడ్డి, లాజర్‌, కుమార్‌, రాజేష్‌, వేగేశ్న రామరాజు, కంతేటి రామరాజు, నాగేంద్ర తదితర ఆక్వారైతులు పాల్గొన్నారు.