కడప: జగన్‌ హామీలన్నీ ఫ్యాన్‌ గాలికి కొట్టుకుపోయాయని ఏపీ పీసీసీ అధ్యక్షురాలు వైఎస్‌ షర్మిల ఎద్దేవా చేశారు. ఐదేళ్లుగా వైకాపా ముఖ్యులంతా ఓ ముఠాగా ఏర్పడి అధికారాన్ని అక్రమాల కోసం వినియోగించారని విమర్శించారు. కడప అభివృద్ధిని విస్మరించి, కనీసం తాగునీటిని కూడా ఇవ్వని వైకాపా నాయకులకు ఓటెందుకు వేయాలో ప్రజలు ఆలోచించాలని కోరారు.

‘‘అంజాద్‌ బాషా, మల్లికార్జున్‌రెడ్డి, రవీంద్రనాథ్‌రెడ్డి అందరూ దోపిడీదారులే. కడపలో వైకాపా చేసిన అభివృద్ధి శూన్యం. రాష్ట్రానికి ప్రత్యేక హోదా లేదు. రాజధాని లేదు. రాష్ట్రంలో మద్యం ఏరులై పారుతోంది తప్ప అభివృద్ధి ఎక్కడా కనిపించడంలేదు. న్యాయం కోసం వైఎస్‌ వివేకానంద రెడ్డి ఆత్మ ఘోషిస్తోంది. చట్టసభలకు నిందితులు రావొద్దనే నేను పోటీ చేస్తున్నా. కడప ఎంపీగా నన్ను గెలిపించాలని కోరుతున్నా. ఎంపీగా రాజశేఖర్‌రెడ్డి బిడ్డ కావాలో.. వివేకాను హత్య చేయించిన అవినాష్‌రెడ్డి కావాలో నిర్ణయించుకోవాల్సిన సమయం వచ్చింది’’ అని షర్మిల అన్నారు.