ఆత్మీయ సమావేశంలో మందకృష్ణ మాదిగ

క్రోసూరు, న్యూస్‌టుడే: కూటమి ప్రభుత్వ ఏర్పాటుతోనే దళిత బిడ్డలకు భవిష్యత్తు ఉంటుందని ఎమ్మార్పీఎస్‌ వ్యవస్థాపకుడు మందకృష్ణ మాదిగ పేర్కొన్నారు. పల్నాడు జిల్లా క్రోసూరులోని తెదేపా కార్యాలయంలో బుధవారం మాదిగల ఆత్మీయ సమావేశం నిర్వహించారు. ఈ సమావేశానికి ముఖ్యఅతిథిగా హాజరైన ఆయన మాట్లాడుతూ షెడ్యూల్‌ కులాల వర్గీకరణ జరిగితేనే భవిష్యత్తు ఉంటుందన్నారు. తెదేపా, వైకాపా, భాజపాల నుంచి ఇప్పటికే పలుమార్లు ఎమ్మెల్యే, ఎంపీగా పోటీకి తనకు అవకాశం వచ్చినా.. ఉద్యమం నీరుగారిపోతుందనే కారణంతో పదవులు వద్దనుకున్నట్లు తెలిపారు. ఒక్క అవకాశమివ్వండని అంటూ అధికారంలోకి వచ్చిన జగన్‌ ఐదేళ్లపాటు చేసిన అరాచకాలు అన్నీఇన్నీ కావన్నారు. ఎక్కువగా నష్టపోయిందీ.. ప్రాణాలు కోల్పోయిందీ దళితులేనని అన్నారు. గతంలో తెదేపా అధినేత చంద్రబాబు ఎస్సీ వర్గీకరణకు మద్దతు ఇవ్వడం వల్లే 22 వేల మంది దళితులకు ఉద్యోగాలు వచ్చాయన్నారు. సిద్ధం అంటున్న జగన్‌కు ఏబీసీడీ వర్గీకరణ చేసే దుమ్ముందా అని చంద్రబాబు సవాల్‌ విసిరినా ఆయన స్పందించలేదన్నారు.  ఎస్సీ వర్గీకరణకు ఎన్డీయే కూటమి మద్దతు ప్రకటించిందన్నారు. రాబోయే ఎన్నికల్లో కూటమి అభ్యర్థులను అఖండ మెజారిటీతో గెలిపించాలని కోరారు. ఈ కార్యక్రమంలో కూటమి ఎంపీ, ఎమ్మెల్యే అభ్యర్థులు లావు శ్రీకృష్ణదేవరాయలు, భాష్యం ప్రవీణ్‌, ఎమ్మార్పీఎస్‌ రాష్ట్ర అధ్యక్షుడు సురేష్‌మాదిగ తదితరులు పాల్గొన్నారు.