నిసర్గ తుపాను: రన్‌వేపై జారిన విమానం

ముంబయి: బెంగళూరు నుంచి ముంబయి చేరుకున్న ఫెడ్‌ఎక్స్‌కు చెందిన సరకు రవాణా విమానం ఒకటి ముంబయి విమానాశ్రయంలో రన్‌వేపై జారింది. నిసర్గ తుపాను కారణంగా వీచిన గాలులు, వర్షం కారణంగా ఈ ఘటన చోటుచేసుకుంది. మధ్యాహ్నం 12 గంటల ప్రాంతంలో ఈ ప్రమాదం జరిగింది. అయితే, ప్రమాదం వల్ల ఇతర విమాన కార్యకలాపాలకు ఎలాంటి ఆటంకగం కలగలేదని ముంబయి ఇంటర్నేషనల్‌ ఎయిర్‌పోర్ట్‌ లిమిటెడ్‌ వెల్లడించింది. ఈ ఘటన నేపథ్యంలో రాత్రి 7 గంటల వరకు విమానాశ్రయంలో రాకపోకలు నిషేధించినట్లు ఎయిర్‌పోర్ట్‌ అధికారులు వెల్లడించారు.

మరోవైపు నిసర్గ తుపాను మధ్యాహ్నం 1 గంట ప్రాంతంలో మహారాష్ట్ర తీర ప్రాంతం రాయ్‌గఢ్‌‌ జిల్లా ఆలీబాగ్‌ వద్ద తీరం దాటింది. అయితే, ఈ తుపాను నుంచి ముంబయి తప్పించుకుంది. తీరం దాటినప్పుడు తుపాను బలహీన పడడంతో ముంబయి మరో ముప్పు నుంచి బయటపడింది. తీర ప్రాంత జిల్లా రాయ్‌గఢ్‌ జిల్లాపై దీని ప్రభావం ఎక్కువగా ఉంది. దీంతో పలు చోట్ల చెట్లు నేల కూలాయి.