India Corona : అదుపులోనే కరోనా : వెయ్యిలోపు కేసులు.. 6 మరణాలు..

దిల్లీ: దేశంలో కరోనా మహమ్మారి అదుపులోనే ఉంది. గత కొన్ని రోజులుగా స్వల్ప హెచ్చుతగ్గులతో వెయ్యికి సమీపంలోనే కొత్త కేసులు వెలుగులోకి వస్తుండగా.. మరణాల సంఖ్య గణనీయంగా తగ్గుతుండటం ఊరట కలిగిస్తోంది. కేంద్ర ఆరోగ్య శాఖ వెల్లడించిన గణాంకాల ప్రకారం..

* గడిచిన 24 గంటల్లో 3,67,213 నిర్ధారణ పరీక్షలు నిర్వహించగా.. 949 కేసులు వెలుగులోకి వచ్చాయి.

* ఇక నిన్న కరోనాతో ఆరుగురు మృతి చెందగా.. ఇప్పటి వరకు మహమ్మారితో ప్రాణాలు కోల్పోయిన వారి సంఖ్య 5,21,743కు చేరింది.

* కొత్త కేసుల కంటే రికవరీలు కాస్త తక్కువగా ఉండటం గమనించాల్సిన విషయం. నిన్న 810 మంది కోలుకోగా ఇప్పటి వరకు వైరస్‌ను జయించిన వారి సంఖ్య 4.25 కోట్లు దాటింది. రికవరీ రేటు  98.76 శాతంగా ఉంది.

* ప్రస్తుతం క్రియాశీల కేసుల సంఖ్య స్పల్పంగా పెరిగి 11,191కు చేరింది. ఆ రేటు 0.03%గా ఉంది.

* ఇక టీకా కార్యక్రమం నిరంతరాయంగా కొనసాగుతోంది. నిన్న 6,66,660 మందికి టీకాలు వేయగా.. ఇప్పటి 186.30 కోట్ల డోసులను పంపిణీ చేశారు.

* ఇక దేశ రాజధాని దిల్లీలో కేసులు క్రమంగా పెరుగుతుండటం ఆందోళన కలిగిస్తోంది. అంతకుముందు రోజు అక్కడ 299 కేసులు నమోదు కాగా.. నిన్న 325 కేసులు వెలుగులోకి వచ్చాయి. అయితే అక్కడ తాజాగా మరణాలు నమోదుకాకపోవడం ఊరట కలిగించే విషయం.