అసెంబ్లీలో లంచం డబ్బులు ప్రదర్శించిన ఆప్‌ ఎమ్మెల్యే

దిల్లీ: దేశ రాజధాని దిల్లీ అసెంబ్లీలో అనూహ్య పరిణామం చోటుచేసుకుంది. అక్రమాలను బయటపెట్టకుండా ఉండేలా తనకు లంచం ఇచ్చేందుకు ప్రయత్నించారని ఆరోపించిన ఆమ్‌ ఆద్మీ పార్టీ ఎమ్మెల్యే మహేందర్‌ గోయల్‌ ఆ డబ్బులను శాసనసభకు తీసుకొచ్చి చూపించారు. బుధవారం అసెంబ్లీ సమావేశాల్లో పాల్గొన్న మహేందర్‌ గోయల్‌ మాట్లాడుతూ.. రోహిణి జిల్లాలోని డా. బాబాసాహెబ్‌ అంబేడ్కర్‌ ఆసుపత్రిలో తాత్కాలిక సిబ్బంది నియామకాల్లో అవకతవకలు జరుగుతున్నాయని ఆరోపించారు. ఈ నియామకాల ప్రక్రియను ఓ ప్రైవేటు కాంట్రాక్టరుకు అప్పగించారని, ఆయన  ఉద్యోగుల నుంచి డబ్బులు తీసుకుంటున్నారని పేర్కొన్నారు. దీనిపై తాను డీసీపీ, చీఫ్‌ సెక్రటరీ, లెఫ్టినెంట్‌ గవర్నర్‌కు ఫిర్యాదు చేశానని తెలిపారు. దీంతో ఆ కాంట్రాక్టరు తనతో ఒప్పందం కుదుర్చుకునేందుకు ప్రయత్నించి తనకు లంచం ఇచ్చారని ఆరోపించారు. ఆ ‘లంచం’ డబ్బులు ఇవేనంటూ ఓ సంచిలో నుంచి తీసి శాసనసభ సభ్యులకు చూపించారు. ఈ విషయంలో తాను మాట్లాడకుండా ఉండేందుకు కొందరు శక్తిమంతమైన వ్యక్తులు ప్రయత్నిస్తున్నారని ఆరోపించారు.