Rajasthan: దళితుడితో ఎమ్మెల్యే బూట్లు నాకించిన రాజస్థాన్‌ డీఎస్పీ!

రాజస్థాన్‌లో ఓ దళిత వ్యక్తి (51)తో పోలీసు అధికారి అమానవీయంగా ప్రవర్తించినట్లు కేసు నమోదైంది. ఫిర్యాదు ప్రకారం.. బాధితుడిపై మూత్రవిసర్జన చేయడమేగాక, అతడి చేత స్థానిక కాంగ్రెస్‌ ఎమ్మెల్యే గోపాల్‌ మీణా బూట్లు నాకించారు. జూన్‌ 30న ఈ ఘటన జరగ్గా.. పోలీసు అధికారి, ఎమ్మెల్యేల భయంతో బాధితుడు వెంటనే ఈ విషయం బయటపెట్టలేదు. చివరకు జులై 27న అతడు పోలీసులకు ఫిర్యాదు చేశాడు. ఆ రోజు.. తన భార్యతో కలిసి పొలంలో పనిచేసుకొంటూ ఉండగా కొందరు పోలీసులు దాడి చేసి ఎమ్మెల్యే ఇంటికి లాక్కెళ్లారని, అక్కడ డీఎస్పీ శివకుమార్‌ తనపై మూత్రవిసర్జన చేసినట్లు బాధితుడు ఎఫ్‌ఐఆర్‌లో పేర్కొన్నాడు. ఎమ్మెల్యే అనుమతి లేకుండా ఆ పొలంలో ఎలా దిగుతావని పోలీసులు బెదిరించారని ఆరోపించారు. ఫోను కూడా లాగేసుకున్నారని, ఈ విషయం ఎవరికైనా చెబితే తీవ్ర పరిణామాలను ఎదుర్కోవాల్సి ఉంటుందని బెదిరించారని బాధితుడు వాపోయాడు. తన ఫిర్యాదును పోలీసులు తొలుత నిరాకరించారని, కోర్టు ఆదేశాల తర్వాతే వారు కేసు నమోదు చేసినట్లు తెలిపాడు.