బిహార్‌లో ఒకే కాన్పులో అయిదుగురు ఆడశిశువులు

ఈటీవీ భారత్‌: బిహార్‌లోని కిషన్‌గంజ్‌ జిల్లాలో ఓ మహిళ ఒకే కాన్పులో అయిదుగురు ఆడబిడ్డలకు జన్మనిచ్చింది. అయిదుగురు శిశువులూ ఆరోగ్యంగా ఉన్నారని వైద్యులు చెప్పారు. కిషన్‌గంజ్‌ జిల్లాలోని ఠాకుర్‌గంజ్‌కు చెందిన తాహీరా బేగం గర్భంలో అయిదుగురు శిశువులు ఉన్నట్లు వైద్యులు ముందే గుర్తించారు. ఆమెకు పురిటినొప్పులు రావడంతో కుటుంబసభ్యులు ఠాకుర్‌గంజ్‌ కమ్యూనిటీ ఆరోగ్యకేంద్రానికి తీసుకువచ్చారు. అక్కడి వైద్యులు సురక్షితంగా ప్రసవం చేశారు. తాహీరాకు ఇదివరకే ఒక కుమారుడు ఉన్నాడు. మహిళ గర్భం దాల్చే సమయంలో బహుళ అండాలు ఏకకాలంలో ఫలదీకరణం చెందడం వల్ల ఇలా ఒకే కాన్పుల్లో ఎక్కువమంది శిశువులు జన్మిస్తారని డాక్టర్‌ అనిల్‌కుమార్‌ తెలిపారు. జన్యుపరమైన కారణాల వల్ల కూడా ఇలా జరగవచ్చన్నారు.