Ram: రామోజీ ఫిల్మ్‌సిటీలో వారియర్‌ పోరాటాలు

యాక్షన్‌ ఘట్టాల కోసం భారీసెట్లు

రామ్‌ మరోసారి తన యాక్షన్‌ సత్తా చూపెట్టడానికి భారీ ఎత్తున సిద్ధమవుతున్నారు. ఆయన కథానాయకుడిగా ప్రముఖ దర్శకుడు లింగుస్వామి తెరకెక్కిస్తోన్న చిత్రం ‘ది వారియర్‌’. తెలుగు, తమిళ భాషల్లో రూపొందుతున్న ఈ చిత్రాన్ని శ్రీనివాసా సిల్వర్‌ స్క్రీన్‌ పతాకంపై శ్రీనివాసా చిట్టూరి నిర్మిస్తున్నారు. ఈ సినిమాలోని కీలక సన్నివేశాల చిత్రీకరణ ప్రస్తుతం రామోజీ ఫిల్మ్‌సిటీలో జరుగుతోంది. ప్రత్యేకంగా ఐదు భారీసెట్లలను ఈ సినిమా కోసం తీర్చిదిద్దారు. వాటిల్లోనే రామ్‌, ఆది పినిశెట్టి తదితరులపై కీలకమైన పోరాట ఘట్టాలను చిత్రీకరిస్తున్నారు. ఈ సందర్భంగా చిత్ర నిర్మాత శ్రీనివాసా చిట్టూరి ‘ఈనాడు సినిమా’తో మాట్లాడుతూ ‘‘రామ్‌ శక్తిమంతమైన పోలీస్‌ అధికారిగా నటిస్తున్నారు. ఆయన కెరీర్‌లో భారీ బడ్జెట్‌తో తెరకెక్కుతోన్న చిత్రమిది. మాస్‌ యాక్షన్‌ ఎంటర్‌టైనర్‌గా రూపొందుతున్న ఈ చిత్రంలో రామ్‌ గెటప్‌కు మంచి స్పందన లభించింది. కథ డిమాండ్‌ మేరకు ఖర్చుకు ఎక్కడా వెనుకాడకుండా రామోజీ ఫిల్మ్‌సిటీలో ప్రత్యేకంగా సెట్లను తీర్చిదిద్దాం. ఫైట్‌ మాస్టర్‌ అన్బు-అరివు నేతృత్వంలో యాక్షన్‌ ఘట్టాలను చిత్రీకరిస్తున్నాం. కర్నూలు నేపథ్యంగా సాగే ఈ యాక్షన్‌ సన్నివేశాలు సినిమాలో కీలకంగా నిలవనున్నాయి’’ అని చెప్పారు. దేవిశ్రీ ప్రసాద్‌ స్వరాలు అందిస్తున్న ఈ చిత్రంలో కృతిశెట్టి నాయికగా నటిస్తోంది. సుజీత్‌ వాసుదేవ్‌ ఛాయాగ్రాహకుడిగా వ్యవహరిస్తున్నారు.