చిరు నట విశ్వరూపానికి 28ఏళ్లు

ఇంటర్నెట్‌డెస్క్‌: ‘గ్యాంగ్‌ లీడర్‌’, ‘రౌడీ అల్లుడు’, ‘ఘరానా మొగుడు’ వరుసగా మూడు హ్యాట్రిక్‌ విజయాలతో జోరుమీదున్న చిరంజీవి ఆ తర్వాత నటించిన వైవిధ్యమైన క్లాస్‌ చిత్రం ‘ఆపద్బాంధవుడు’. కళాతపస్వి కె.విశ్వనాథ్‌ దర్శకత్వంలో తెరకెక్కిన ఈ చిత్రం విడుదలై (అక్టోబరు 9) 28 సంవత్సరాలు పూర్తి చేసుకుంది. నటనపరంగా చిరంజీవిని మరోస్థాయికి తీసుకెళ్లింది ఈ చిత్రం.

చిరు అభినయంతో ఈ చిత్రాన్ని తన భుజస్కందాలపై మోశారు. ఇక ఇందులో శివుడి పాత్రలో కనిపించి అలరించారు. చిరంజీవితో పాటు మీనాక్షి శేషాద్రి, శరత్‌బాబు, రచయిత, దర్శకుడు జంధ్యాల గుర్తుండిపోయే పాత్రల్లో నటించారు. ఇక సంగీత దర్శకుడు ఎం.ఎం.కీరవాణి ఈ సినిమాకు ప్రాణం పోశారు. తనదైన పాటలు, సంగీతంతో ప్రేక్షకులను విశేషంగా అలరించారు. ఆయన స్వరపరిచిన పాటలు ఇప్పటికీ అలరిస్తూనే ఉంటాయి.

జంధ్యాల తొలిసారి మేకప్‌ వేసుకొన్న చిత్రమిది. ఈ సినిమాకి సంభాషణలు అందించిన జంధ్యాల.. ఇందులోని పరంధామరాజు పాత్రని ప్రేమించడం మొదలెట్టారు. చివరకి ఈ పాత్ర తానే చేస్తానని నిర్మాత ఏడిద నాగేశ్వరరావుకి చెప్పడంతో ఆయన ఈ విషయాన్ని దర్శకుడు కె.విశ్వనాథ్‌కు చెప్పారు. అలా జంధ్యాల నటించిన మొదటి, చివరి చిత్రంగా ‘ఆపద్బాంధవుడు’ నిలిచింది.

ఉత్తమ నటుడిగా రెండోసారి నంది అవార్డు అందుకోవడమే కాదు, ఆ ఏడాది జాతీయస్థాయిలో ఉత్తమ నటుడి కేటగిరిలో చిరు గట్టి పోటీ ఇచ్చారు. ఇక ఈ చిత్రం మొత్తం ఐదు కేటగిరీల్లో నంది అవార్డులను సొంతం చేసుకుంది. ఉత్తమ చిత్రం, ఉత్తమనటుడు, ఉత్తమ రచయిత, ఉత్తమ కళా దర్శకుడు, ఉత్తమ కొరియోగ్రాఫర్‌ విభాగాల్లో అవార్డులు రాగా, చిరు ఉత్తమ నటుడిగా ఫిల్మ్‌ఫేర్‌ సొంతం చేసుకున్నారు.