మేఘన సీమంతంలో చిరు..!

భావోద్వేగానికి గురైన అభిమానులు

బెంగళూరు: ఇటీవల ఆకస్మికంగా కన్నుమూసిన కన్నడ నటుడు చిరంజీవి సర్జా సతీమణి మేఘన సీమంతం వేడుక సోమవారం జరిగింది. అయితే చిరు నిల్చున్నట్లు ఉన్న ఓ కటౌట్‌ని తయారు చేయించి.. ఈ వేడుకలో మేఘన పక్కనే ఉంచారు. అతి తక్కువ మంది కుటుంబసభ్యుల సమక్షంలో జరిగిన ఈ వేడుకకు సంబంధించిన ఫొటోలను తాజాగా ఆమె సోషల్‌మీడియా వేదికగా అభిమానులతో పంచుకున్నారు. వేడుకలో భాగంగా తన భర్త చిత్రపటంతో తీసుకున్న ఓ అపురూపమైన ఫొటోని షేర్‌ చేసిన మేఘన.. ‘నాకెంతో ప్రత్యేకమైన ఇద్దరు వ్యక్తులు. చిరు.. నువ్వు ఇలాగే కదా ఈ వేడుక జరగాలని కోరుకున్నావు. నువ్వు కోరుకున్న విధంగానే జరిగింది. ఇకపై ఎప్పటికీ కూడా జరుగుతుంది. ఐ లవ్‌ యూ బేబీ మా’ అని పేర్కొన్నారు. మరోవైపు ఆమె షేర్‌ చేసిన ఫొటోలు చూసిన అభిమానులు భావోద్వేగానికి గురి అవుతున్నారు. ‘చిరంజీవి సర్‌ కటౌట్‌ చూస్తుంటే‌.. ఆయన నిజంగా వేడుకలో ఉన్నట్లే ఉంది’, ‘మేడమ్ మీకు అంతా మంచే జరగాలి. అలాగే మీరు ఎప్పుడూ సంతోషంగానే ఉండాలని కోరుకుంటున్నాం’ అని పలువురు నెటిజన్లు కామెంట్లు పెడుతున్నారు.

మేఘనా రాజ్‌ - చిరంజీవి సర్జా.. ప్రేమ తర్వాత పెద్దల అంగీకారంతో 2018లో వివాహబంధంలోకి అడుగుపెట్టారు. అయితే ఈ ఏడాది జూన్‌ నెలలో గుండెపోటు రావడంతో చిరు మృతిచెందిన విషయం తెలిసిందే.