Alia Bhatt: అరుదైన అవకాశం దక్కించుకున్న అలియా భట్‌ చిత్రం.. అదేంటంటే?

ఇంటర్నెట్‌ డెస్క్‌: రణ్‌వీర్‌ సింగ్‌ (Ranveer Singh), అలియా భట్‌ (Alia Bhatt) జంటగా నటించిన చిత్రం ‘రాకీ ఔర్‌ రాణీ కీ ప్రేమ్‌ కహానీ’ (Rocky Aur Rani Kii Prem Kahaani). ఈ ఏడాది జులైలో విడుదలైన ఈ రొమాంటిక్‌ కామెడీ ఫ్యామిలీ డ్రామా బాక్సాఫీసు వద్ద హిట్‌గా నిలిచింది. ఇప్పుడు అరుదైన అవకాశం అందుకుంది. ‘బుసాన్‌ ఇంటర్నేషనల్‌ ఫిల్మ్‌ ఫెస్టివల్‌’ (Busan International Film Festival)లో ప్రదర్శితం కానున్న సినిమాల జాబితాలో నిలిచింది. ప్రతిష్ఠాత్మకమైన ఈ ఫెస్టివల్‌లో స్క్రీనింగ్‌కు ఎంపికైనందుకు చిత్ర నిర్మాణ సంస్థ ధర్మ ప్రొడక్షన్స్‌ ఆనందం వ్యక్తం చేసింది. ‘ఓపెన్‌ సినిమా’ కేటగిరీలో ఈ సినిమా సెలెక్ట్‌ అయిందని సోషల్‌ మీడియా వేదికగా తెలిపింది. ఆసియా దేశాలకు సంబంధించి యువ ప్రతిభను ప్రోత్సహించేందుకు ప్రతి సంవత్సరం ఈ వేడుక నిర్వహిస్తుంటారు. 1996లో ప్రారంభమవగా ఇప్పటికి 27 ఫిల్మ్‌ ఫెస్టివల్స్‌ పూర్తయ్యాయి. ఈ ఏడాది అక్టోబరు 4 నుంచి 13 వరకు ఈ వేడుక జరగనుంది.

‘బాహుబలి’ తర్వాత పాకిస్థాన్‌లోనూ అలా పిలిచారు: సత్యరాజ్‌

ప్రముఖ నిర్మాత, నటుడు, దర్శకుడు కరణ్‌ జోహార్‌ ఈ చిత్రాన్ని తెరకెక్కించారు. సీనియర్‌ నటులు ధర్మేంద్ర, జయా బచ్చన్‌, షబానా అజ్మీ కీలక పాత్రలు పోషించారు. మరోవైపు, అలియా భట్‌.. ఉత్తమ నటిగా జాతీయ అవార్డుకు ఎంపికైన సంగతి తెలిసిందే. ‘గంగూబాయి కాఠియావాడి’ సినిమాలోని నటనకుగాను ఆమెకు ఈ పురస్కారం లభించింది.