Dhoni: రజనీకాంత్‌ చేతిలో ధోనీ ‘అథర్వ’.. ట్రైలర్‌ చూశారా!

ఇంటర్నెట్‌ డెస్క్‌: టీమిండియా మాజీ సారథి ధోనీ నటుడిగా సందడి చేయనున్న సంగతి తెలిసిందే. ‘అథర్వ: ది ఆరిజన్‌’ పేరుతో రూపొందుతున్న గ్రాఫిక్స్‌ వెబ్‌ సిరీస్‌లో ఆయన కనిపించనున్నారు. ఈ సిరీస్‌ తెరకెక్కేందుకు ఆధారమైన ‘అథర్వ: ది ఆరిజన్‌’ నవలను ప్రముఖ కథానాయకుడు రజనీకాంత్‌ తాజాగా విడుదల చేశారు. నవలకు మంచి ఆదరణ దక్కాలని, సిరీస్‌ మంచి విజయం అందుకోవాలని ఆకాంక్షించారు. ఈ విషయాన్ని తెలియజేస్తూ సిరీస్‌ దర్శకనిర్మాతలు సోషల్‌ మీడియా వేదికగా ఓ వీడియోను విడుదల చేశారు. ధోనీ మాటలతో ప్రారంభమైన ఈ ‘బుక్‌ లాంచ్‌ ట్రైలర్‌’ అటు క్రీడా, ఇటు సినీ అభిమానుల్లో ఆసక్తి పెంచుతోంది. ఈ సైన్స్‌ ఫిక్షన్ నవలను రాసిన రమేశ్‌ తమిల్‌మనినే సిరీస్‌కు దర్శకత్వం వహిస్తున్నారు. ధోనీ ఇందులో విరోచిత పాత్రలో అలరించనున్నారు. ఈ సిరీస్‌ త్వరలోనే ప్రేక్షకుల ముందుకురానుంది.