Chiranjeevi: చిరు ‘లూసిఫర్‌’ రీమేక్‌లో ఈ బాలీవుడ్‌ నటుడు?

ఇంటర్నెట్‌ డెస్క్‌: వరుస సినిమాలతో బిజీగా ఉన్నారు అగ్ర కథానాయకుడు చిరంజీవి. ప్రస్తుతం ఆయన మలయాళ చిత్రం ‘లూసిఫర్‌’ రీమేక్‌లో నటిస్తున్న విషయం తెలిసిందే. మోహన్‌రాజా దర్శకత్వంలో కొణిదెల ప్రొడక్షన్స్‌, ఎన్‌వీఆర్‌ సినిమా సంయుక్త నిర్మాణంలో ఈ చిత్రం తెరకెక్కుతోంది. ఈ క్రమంలో చిత్ర నిర్మాతలు సినీ అభిమానులకు ఊహించని బహుమతి ఇవ్వనున్నారా? ఇదే విషయమై సామాజిక మాధ్యమాల్లో ఒక ఆసక్తికర చర్చ జరుగుతోంది. అదేంటంటే.. బాలీవుడ్‌ ప్రముఖ నటుడు సల్మాన్‌ఖాన్‌.. చిరంజీవితో కలిసి ఈ చిత్రంలో తెర పంచుకోనున్నట్టు తెలుస్తోంది. ఇందులో కీలక పాత్ర విషయమై చిత్ర నిర్మాతలు సల్మాన్‌ను సంప్రదించినట్లు, దీనికి ఆయనకూడా ఓకే చెప్పినట్లు వార్తలు చక్కర్లు కొడుతున్నాయి.  మరోవైపు ఈ విషయాన్ని అధికారికంగా ధ్రువీకరించలేదు. ఒకవేళ ఇదే నిజమైతే అభిమానులకు పండగే! ఇది చిరంజీవి 153వ సినిమా. ఇంకా టైటిల్‌ ఖరారు చేయలేదు. తమన్‌ స్వరాలందిస్తున్నారు.