Alia Bhatt: ఆ అవార్డును ఆలియాకు అంకితమిచ్చిన రేఖ.. కామెంట్స్‌ వైరల్‌

ఇంటర్నెట్‌ డెస్క్‌: బాలీవుడ్‌ ప్రముఖ నటి రేఖ (Rekha)కు ‘దాదా సాహెబ్‌ ఫాల్కే ఇంటర్నేషనల్‌ ఫిల్మ్‌ ఫెస్టివల్‌’- 2023 (Dada Saheb Phalke International Film Festival) అవార్డు దక్కిన సంగతి తెలిసిందే. హిందీ చిత్రపరిశ్రమకు ఆమె చేసిన సేవకు గుర్తుగా ఆనరరీ విభాగంలో ఆ పురస్కారం లభించింది. ముంబయి వేదికగా ఫిబ్రవరిలో జరిగిన ఆ అవార్డుల ప్రదానోత్సవంలో ఆలియాభట్‌పై రేఖ చేసిన కామెంట్స్‌ ఇప్పుడు వైరల్‌గా మారాయి. కారణమేంటంటే? సంబంధిత ప్రోమో నెట్టింట విడుదలకావడం. ఆ ఫిల్మ్‌ ఫెస్టివల్‌ ప్రత్యక్ష ప్రసారం ఓ ఓటీటీలో స్ట్రీమింగ్‌కాగా రికార్డెడ్‌ దృశ్యాలు ఓ ప్రముఖ ఛానల్‌లో ఆదివారం టెలికాస్ట్‌ అయ్యాయి. ప్రచారంలో భాగంగా సంబంధించి ఛానల్‌ సెకన్ల నిడివి ఉన్న వీడియోను సోషల్‌ మీడియాలో పోస్ట్‌ చేసింది.

అందులో.. ట్రోఫీని స్వీకరించిన అనంతరం రేఖ, ఆలియా భట్‌ (Alia Bhatt) వేదికపైకి ఉండడం కనిపించింది. రేఖ మాట్లాడుతూ.. ‘‘ఈ అవార్డును ఆలియాకు అంకితమిస్తున్నా. ఆమె ఫ్యూచర్‌ లెజెండ్‌’’ అంటూ ప్రశంసించారు. సీనియర్‌ నటి లెజెండ్‌ అని వ్యాఖ్యానించడంతో ఆలియా ఫ్యాన్స్‌ ఖుషీ అవుతున్నారు. అదే వేడుకలో ఆలియా ఉత్తమ నటిగా అవార్డు అందుకున్నారు. ‘గంగూబాయి కాఠియావాడి’లోని నటనకుగాను ఆమెను ఆ పురస్కారం వరించింది.