Harish Shankar: ‘ఉస్తాద్‌ భగత్‌సింగ్‌’ రీమేకా? హరీశ్‌ శంకర్ ఏమన్నారంటే!

ఇంటర్నెట్‌ డెస్క్: పవన్ కల్యాణ్ హీరోగా హరీశ్‌ శంకర్‌ తెరకెక్కిస్తోన్న చిత్రం ‘ఉస్తాద్‌ భగత్‌సింగ్‌’. ఈ సినిమా రీమేకా? అని నెటిజన్‌ అడిగిన ప్రశ్నకు ఆయన సమాధానం చెప్పారు. తాజాగా హరీశ్‌ శంకర్‌ సోషల్‌మీడియాలో అభిమానులతో ముచ్చటించారు. ఆయన అప్‌కమింగ్‌ సినిమాలకు సంబంధించిన విశేషాలను పంచుకున్నారు. #Askharish పేరుతో ఎక్స్‌లో సెక్షన్‌ నిర్వహించారు. ఇందులో ఆసక్తికర విషయాలను పంచుకున్నారు. ‘ఉస్తాద్ భగత్‌సింగ్‌’ను ఉద్దేశిస్తూ.. పవన్‌ కల్యాణ్‌ను గుర్తుచేయడానికి, గుర్తుండిపోయే సినిమా తీయడానికి చిత్రబృందమంతా కష్టపడుతున్నట్లు చెప్పారు.

‘ఉస్తాద్‌ భగత్‌సింగ్‌’ రిలీజ్‌ ఎప్పుడు?
హరీశ్‌ శంకర్‌: త్వరలోనే విడుదల తేదీని ప్రకటిస్తాం.

మీకు నచ్చిన పవన్‌ కల్యాణ్ సినిమా ఏది?
హరీశ్‌ శంకర్‌: తొలిప్రేమ, ఖుషి

మల్టీ స్టారర్ సినిమా తీస్తారా? 
హరీశ్‌ శంకర్‌: దానికి సంబంధించిన పనులు జరుగుతున్నాయి.

మీ సినిమా కంటే ముందు ‘ఓజీ’ వస్తే.. మీదానిపై అంచనాలు పెరిగిపోతాయంటారా?
హరీశ్‌ శంకర్‌: నా దృష్టిలో ఇలా విడుదలవ్వడం పోటీ కాదు. ఇది మనందరికీ ఒక వేడుకతో సమానం.

టాలీవుడ్‌ కంటే కోలీవుడ్‌లో మంచి సినిమాలు వస్తున్నాయంటారా?
హరీశ్‌ శంకర్‌: ప్రస్తుతం దేశమంతా తెలుగు సినిమా పరిశ్రమవైపు చూస్తోంది. అలాగే తమిళ ఆడియన్స్‌ కూడా వాళ్ల సినిమాలను ఎంతో గౌరవిస్తారు.

‘ఉస్తాద్‌ భగత్‌సింగ్‌’ రీమేకా.. కాదా?
హరీశ్‌ శంకర్‌: నాపై నమ్మకం ఉంచండి. మీ ఎదురుచూపులకు తగ్గట్లు సినిమా ఉంటుంది. మీరు ఎంత భారీగా అంచనాలు పెట్టుకున్నా.. వాటిని ఈ చిత్రం కచ్చితంగా అందుకుంటుంది.

మీ సినిమాలు రీమేక్‌లా ఉంటాయని టాక్ వినిపిస్తుంటుంది. మీరు కాపీ కంటెంట్‌ వాడతారా?
హరీశ్‌ శంకర్‌: నా వర్క్‌ నిజంగా తెలిసిన వారు వాటిని రీమేక్‌లు అని పిలవడానికి సిగ్గుపడతారు. నా పనిని చూసి నేనెప్పుడూ గర్వపడుతుంటా. విమర్శించేవారు ఉన్నప్పుడే మనం ఇంకా మెరుగ్గా ప్రయత్నిస్తాం. 

‘ఉస్తాద్‌ భగత్‌సింగ్‌’ కూడా ‘గబ్బర్‌సింగ్‌’ రేంజ్‌లో ఉంటుందా?
హరీశ్‌ శంకర్‌: పనిచేయడం మాత్రమే మన చేతుల్లో ఉంటుంది. ఫలితం కాదు. అయినా.. దానికి మించి ఉండాలని కోరుకుందాం.

ఈ సినిమాను ఫ్యామిలీతో కలిసి చూడొచ్చా?
హరీశ్‌ శంకర్‌: కచ్చితంగా చూడొచ్చు. ఇది యూత్‌, మాస్ ఆడియన్స్‌కు కూడా నచ్చుతుంది. ప్రతి ప్రేక్షకుడికి కన్నుల పండుగగా ఉంటుంది.

ఇలాంటి పెద్ద సినిమా తీస్తున్నప్పుడు ఒత్తిడి గురైతారా?
హరీశ్‌ శంకర్‌: ఒత్తిడి ఎప్పుడూ ఉంటుంది. కానీదాన్ని జయించగలగాలి.

భవిష్యత్తులో ఏ జోనర్‌లో సినిమాలు తీస్తారు?
హరీశ్‌ శంకర్‌: మానవ సంబంధాలు, లవ్‌స్టోరీలు.. ఈ రెండు జోనర్‌లలో తీస్తాను.

ఇక ‘ఉస్తాద్‌ భగత్‌సింగ్‌’ (ustaad bhagat singh) విషయానికొస్తే..  ‘గబ్బర్‌ సింగ్‌’ తర్వాత పవన్‌-హరీశ్‌ శంకర్‌ల కాంబినేషన్‌లో ఇది రానుంది. ఇందులో పవన్‌ కల్యాణ్‌ పోలీస్‌ పాత్రలో కనిపించనున్నారు. ఆయన సరసన మోస్ట్‌ వాంటెడ్ హీరోయిన్‌ శ్రీలీల నటిస్తోంది. దేవీశ్రీ ప్రసాద్‌ సంగీతం అందిస్తున్నారు. శరవేగంగా షూటింగ్ జరుగుతోన్న ఈ చిత్రంలో ఇటీవలే ముఖ్యమైన భాగాన్ని పూర్తి చేశారు.