Akshay Kumar: 500మంది డ్యాన్సర్లతో వెల్‌కమ్‌ ఆటాపాటా

బాలీవుడ్‌లోని ప్రముఖ నటీనటులందరినీ ఏకం చేసి కొత్త తరహా కాన్సెప్ట్‌తో ప్రేక్షకులను అలరించడానికి రాబోతున్న చిత్రం ‘వెల్‌కమ్‌ టు ది జంగిల్‌’. అగ్రకథానాయకుడు అక్షయ్‌ కుమార్‌ ప్రధాన పాత్రలో నటిస్తున్నారు. అహ్మద్‌ ఖాన్‌ తెరకెక్కిస్తున్నారు. ప్రస్తుతం ఈ సినిమా చిత్రీకరణ శరవేగంగా జరుగుతోంది. తాజాగా ఈ సినిమాలో 500మంది డ్యాన్సర్లతో ఓ పాటను చిత్రీకరించనున్నట్లు తెలుస్తుంది. ‘‘మునుపెన్నడూ చూడని విధంగా ఓ సరికొత్త గీతాన్ని తీర్చిదిద్దుతుంది ‘వెల్‌కమ్‌’ చిత్రబృందం. ఏకంగా 30మంది నటీనటులు ఈ పాటలో ప్రత్యేకంగా ఆడిపాడనున్నారు. దీనికి గణేశ్‌ ఆచార్య కొరియోగ్రఫీ చేస్తున్నారు. ఈ నెలాఖరున ఈ పాట చిత్రీకరణ ప్రారంభం కానుంది. 500 మంది బ్యాక్‌గ్రౌండ్‌ డ్యాన్యర్లతో అక్షయ్‌ కుమార్‌ వేసే స్టెప్పులను చూడడానికి సిద్ధంగా ఉండండి’’ అని సన్నిహిత వర్గాలు తెలిపాయి. దిశా పటానీ, రవీనా టాండన్‌, సంజయ్‌ దత్‌, అనిల్‌ కపూర్‌ తదితరులు నటిస్తున్న ఈ సినిమా డిసెంబరు 20న విడుదల కానుంది.