Nani: ఓ దర్శకుడు అందరి ముందు నన్ను అవమానించాడు: నాని

హైదరాబాద్‌: సినిమా పరిశ్రమలో తనకు ఎదురైన సవాళ్లపై నటుడు నాని (Nani) ఆసక్తికర వ్యాఖ్యలు చేశారు. పరిశ్రమలోకి వచ్చిన కొత్తలో తాను ఎన్నో అవమానాలు ఎదుర్కొన్నట్లు బాలీవుడ్‌ మీడియాకు ఇచ్చిన ఇంటర్వ్యూలో వెల్లడించారు. మరీ, ముఖ్యంగా ఓ దర్శకుడు తనని అందరి ముందు అవమానించాడని చెప్పారు. ‘‘ఎలాంటి బ్యాక్‌గ్రౌండ్‌ లేకుండా ఇండస్ట్రీలోకి వచ్చారు కదా.. మొదట్లో ఏమైనా కష్టంగా అనిపించిందా?’’ అని విలేకరి ప్రశ్నించగా..

‘‘కష్టంగా అనిపించింది. ఎందుకంటే ఇక్కడ ఏం జరుగుతుంది? ఎలా జరుగుతుంది? అనేది మొదట అర్థం కాదు. సాయం చేయడానికి ఇక్కడ ఎవరూ లేరు. మనం నేర్చుకుంటున్న సమయంలోనే కాస్త ఇబ్బందిగా ఉండొచ్చు కానీ, దాని తర్వాత వచ్చే సక్సెస్‌ ఎంతో ప్రత్యేకంగా ఉంటుంది. నేను ఎన్నో సవాళ్లు, తిరస్కరణలు ఎదుర్కొన్నా. ఆ వివరాలు ఇప్పుడు చెప్పాలనుకోవడం లేదు. సినీ పరిశ్రమలో ఉన్న ఎంతోమందితో పోలిస్తే నేను పెద్దగా ఇబ్బందులు ఎదుర్కొలేదని భావిస్తుంటా. నాకంటే ఇంకా ఎక్కువ ఇబ్బందులు పడిన వాళ్లు నాకు తెలుసు’’

‘‘ఒకవేళ నువ్వు (విలేకరి నుద్దేశించి)  గనుక అసిస్టెంట్‌ డైరెక్టర్‌గా ఉండీ.. అందులోనూ క్లాప్‌ అసిస్టెంట్‌గా ఉంటే ఇలాంటి ఎన్నో అవమానాలు ఎదుర్కొవాల్సి ఉంటుంది. ఎవరైనా సరే.. నీకు ఏదైనా చెప్పేయొచ్చని అనుకుంటారు. ఇష్టం వచ్చినట్లు మాటలు అంటారు. వాళ్లందరికీ గట్టిగా సమాధానం చెప్పాలని ఉన్నా.. అన్నింటినీ దిగమింగక తప్పదు. అలాంటి ఎన్నో ఇబ్బందులు నేను ఎదుర్కొన్నా. క్లాప్‌బోర్డ్‌ ఆలస్యమైనా ఏదో ఒకటి అనేవారు. మాటలు పడినందుకు నేను ఎప్పుడూ బాధపడలేదు. కానీ, ఓ దర్శకుడు మాత్రం సెట్‌లో అందరి ముందు నన్ను అవమానించాడు. నేను ఎప్పటికీ దర్శకుడిని కాలేనని అన్నాడు. ఆ మాట నన్ను తీవ్ర మనోవేదనకు గురి చేసింది. అలాంటి ఎన్నో విమర్శలు ఎదుర్కొని ఈ స్థాయికి వచ్చా. స్టార్‌ని అయ్యాక ఆ దర్శకుడిని కలిశా. అప్పుడు కూడా మా చుట్టూ ఉన్న వాతావరణం చెప్పుకోదగిన విధంగా లేదు’’ అని నాని వివరించారు.