SSMB28: మహేశ్‌ - త్రివిక్రమ్ సినిమాలో రష్మిక సాంగ్‌..!

హైదరాబాద్‌: సినిమాల్లోని ఐటెం సాంగ్స్‌కు ప్రత్యేకంగా అభిమానులు ఉంటారు. ఏ చిత్రంలో అయినా ఇలా స్పెషల్‌ సాంగ్‌ ఉంటే ఆ క్రేజే వేరు. అందుకే దర్శక-నిర్మాతలు కూడా ఐటెం సాంగ్‌పై ఆసక్తి చూపిస్తుంటారు. గతంలో ఈ పాటలకు హీరోయిన్స్‌ వేరుగా ఉండేవారు. ఇప్పుడు ఆ ట్రెండ్‌ మారింది. ఓ వైపు సినిమాల్లో బిజీగా ఉన్న భామలే ఐటెం సాంగ్స్‌లోనూ కాలు కదుపుతున్నారు. ఇలా టాప్‌ హీరోయిన్స్‌ చేస్తే ఆ సినిమాకు డబుల్‌ క్రేజ్‌ వస్తుంది. శ్రేయ దగ్గరి నుంచి ఇటీవల సమంత వరకు సినిమాల్లో సింగిల్‌ సాంగ్స్‌తో అలరించారు.  వీరి జాబితాలోకి నేషనల్‌ క్రష్‌ చేరనుందని లేటెస్ట్‌ టాక్‌.

త్రివిక్రమ్‌ దర్శకత్వంలో మహేశ్‌ బాబు కథానాయకుడిగా ఓ సినిమా రానున్న విషయం తెలిసిందే. రష్మిక ఈ సినిమాలో ఐటెం సాంగ్‌ చేయనుందనే వార్తలు వినిపిస్తున్నాయి. ఇటీవల ఈ చిత్రంలోని ఐటెం సాంగ్‌ను ఓ బాలీవుడ్‌ బ్యూటీతో చేయించనున్నారనే రూమర్స్‌ వచ్చాయి. బాలీవుడ్‌ హీరోయిన్‌ స్థానంలో రష్మికను తీసుకున్నట్లు సమాచారం. త్రివిక్రమ్‌ సినిమాల్లో ఇప్పటి వరకు ఐటెం సాంగ్స్‌ లేవు. మొదటిసారి ఈ చిత్రంలో పెట్టనున్నారని టాక్‌. ‘అతడు’, ‘ఖలేజా’ తర్వాత మహేశ్‌బాబు-త్రివిక్రమ్‌ కాంబినేషన్‌లో వస్తోన్న చిత్రమిది. #SSMB28గా ప్రచారంలో ఉంది. పవర్‌ఫుల్‌ కథాంశంతో ఈ సినిమా రానుందని సమాచారం. ఇందులో మహేశ్‌కు జోడీగా పూజాహెగ్డే (Pooja Hegde) నటిస్తోంది. తమన్‌ స్వరాలు అందిస్తున్నారు. ప్రముఖ నిర్మాణ సంస్థ హారిక అండ్‌ హాసిని క్రియేషన్స్‌ పతాకంపై రూపుదిద్దుకోనుంది.