Sarkaaru Noukari: ఓటీటీలోకి ‘సర్కారు నౌకరి’.. స్ట్రీమింగ్ ఎక్కడంటే!

ఇంటర్నెట్‌ డెస్క్‌: ఈ ఏడాది థియేటర్‌లో విడుదలైన మొదటి సినిమా ‘సర్కారు నౌకరి’ (Sarkaaru Noukari). గాయని సునీత కుమారుడు ఆకాశ్‌ గోపరాజు హీరోగా పరిచయమైన ఈ చిత్రం అమెజాన్‌ ప్రైమ్‌ (Amazon prime) వీడియో వేదికగా ప్రసారమవుతోంది. గంగనమోని శేఖర్‌ దర్శకత్వం వహించిన ఈ సినిమాను కె.రాఘవేంద్రరావు నిర్మించారు. ఇందులో భావన హీరోయిన్‌గా నటించగా తనికెళ్ల భరణి, మధులత కీలకపాత్రలు పోషించారు.

క‌థేంటంటే: మ‌హ‌బూబ్ న‌గ‌ర్ జిల్లాలోని కొల్లాపూర్‌కు చెందిన కుర్రాడు గోపాల్ (ఆకాశ్‌ గోప‌రాజు). అతడికి త‌ల్లిదండ్రులు లేరు. క‌ష్ట‌ప‌డి ప్ర‌భుత్వ ఉద్యోగం సాధిస్తాడు. ఈ క్ర‌మంలోనే త‌న సొంత మండ‌లానికి హెల్త్ ప్ర‌మోట‌ర్‌గా వ‌స్తాడు. ఎయిడ్స్‌పై అవ‌గాహ‌న క‌ల్పించ‌డం.. ఊరూరా తిరిగి కండోమ్‌లు పంచ‌డం అత‌ని ప‌ని. త‌న ఫ్రెండ్ స‌హాయంతో పెద్ద‌ల్ని ఒప్పించి స‌త్య (భావ‌న‌)ను పెళ్లి చేసుకుంటాడు. ఆరంభంలో త‌న భ‌ర్త‌ది స‌ర్కారు నౌక‌రి అని స‌త్య ఎంతో పొంగిపోతుంది.  కానీ, ఆ త‌ర్వాత అత‌ను చేసే ప‌ని తెలిసి అస‌హ్యించుకుంటుంది. కండోమ్‌లు పంచుతున్న అతడిని ఊరి వాళ్లంతా ర‌క‌ర‌కాలుగా హేళ‌న చేయ‌డ‌మే కాక.. వాళ్ల కుటుంబాన్ని అంట‌రానివాళ్లుగా చూడ‌ట‌మే దీనికి కార‌ణం. దీంతో ఆ అవ‌మానాలు త‌ట్టుకోలేక భ‌ర్త‌ను ఆ ఉద్యోగం మానేయ‌మ‌ని పోరు పెడుతుంది. కానీ, దానికి గోపాల్ అంగీక‌రించ‌క‌పోవ‌డంతో స‌త్య పుట్టింటికి వెళ్లిపోతుంది. మ‌రి ఆ త‌ర్వాత ఏమైంది? ఎయిడ్స్‌ను నియంత్రించేందుకు అత‌నెలాంటి ప్ర‌య‌త్నాలు చేశాడు? అన్న‌ది మిగిలిన క‌థ‌.