Tamannaah: నా కల నిజమైంది.. ఆ రోజు కోసం ఎదురుచూస్తున్నా: తమన్నా

హైదరాబాద్‌: మిల్కీ బ్యూటీ తమన్నా ప్రస్తుతం చేతినిండా సినిమాలతో బిజీగా ఉంది. ఇటీవల ‘గుర్తుందా శీతాకాలం’ అంటూ ప్రేక్షకుల ముందుకు వచ్చి మెప్పించింది. తన నటన, డ్యాన్స్‌తో ఆకట్టుకునే ఈ అమ్మడు ఇప్పుడు ఇద్దరు అగ్ర హీరోలతో ఆడిపాడడానికి సిద్ధమైంది. ‘భోళా శంకర్‌’ (Bholaa Shankar) సినిమాలో చిరంజీవితో, ‘జైలర్‌ (Jailer)’లో రజనీకాంత్ ‌(Rajinikanth)తో ఈ బ్యూటీ నటించనున్న విషయం తెలిసిందే. తాజాగా ఈ రెండు సినిమాల గురించి తమన్నా మాట్లాడింది.

‘‘రజనీకాంత్‌ సర్‌తో కలిసి పనిచేస్తానని ఎప్పుడూ ఊహించలేదు. నా కల నిజమైంది. ఆయన్ని సెట్‌లో చూసే రోజు కోసం ఎదురుచూశా. అలాగే చిరంజీవి (Chiranjeevi)తో కలిసి నేను ‘సైరా నరసింహారెడ్డి’ (Sye Raa NarasimhaReddy) లో నటించాను. ఇప్పుడు మళ్లీ ‘భోళా శంకర్‌’ (Bholaa Shankar)లో నటించే అవకాశం వచ్చింది. ఆయనతో కలిసి డ్యాన్స్‌ చేయడానికి నేను ఉత్సాహంగా ఉన్నాను’’ అంటూ తన సంతోషాన్ని పంచుకుంది తమన్నా. ఇక తమన్నా ఈ సినిమాలతో పాటు హిందీలో ‘బోల్ చుడీయా’, మలయాళంలో ‘బాంద్రా’ చిత్రాల్లోనూ నటిస్తోంది. మరోవైపు వెబ్‌ సిరీస్‌లతోనూ సందడి చేయడానికి సిద్ధమైందీ ముద్దుగుమ్మ. ఇప్పటికే ఆహా కోసం ‘లెవెన్త్‌ అవర్‌’ లో నటించిన తమన్నా.. అమెజాన్‌ ప్రైమ్‌, హాట్‌స్టార్‌లలోనూ వెబ్‌ సిరీస్‌ల్లో నటిస్తోంది.