vaishnavi chaitanya: ‘బేబి’ కథ విన్నాక నా జీవితమే గుర్తొచ్చింది

‘‘అవకాశం కోసం ఎన్నో ఆఫీసులు తిరిగాను. ఆడిషన్స్‌ ఇచ్చాను. ఎనిమిదేళ్ల కష్టం తర్వాత ఊహించని రీతిలో కథానాయికగా ఓ గొప్ప అవకాశం వచ్చింది. అదే ‘బేబి’ చిత్రం. ఇంత మంచి కథలో భాగం అవుతానని కలలో కూడా అనుకోలేద’’న్నారు వైష్ణవి చైతన్య. ఈ చిత్రం ఈ నెల 14న ప్రేక్షకుల ముందుకొస్తున్న సందర్భంగా మంగళవారం హైదరాబాద్‌లో ముచ్చటించారు.

• ‘‘కొన్ని విషయాలు విన్నప్పుడు ఎలా స్పందించాలో కూడా అర్థం కాక అలా ఉండిపోతాం. ‘బేబి’ అవకాశం దక్కేవరకూ నా పరిస్థితి అదే. అప్పటివరకు నేనొక యూట్యూబర్‌గా, సోషల్‌మీడియా ఇన్‌ఫ్లూయెన్సర్‌గానే తెలుసు.
• కథానాయిక కావాలనే లక్ష్యంతో పరిశ్రమకొచ్చా. ఎనిమిదేళ్లైనా అది నెరవేరకపోవడంతో యూట్యూబర్‌గానే ఉండిపోతానేమో అనుకునేదాన్ని. ఆ దశలో సాయిరాజేశ్‌ ఈ కథ చెప్పినప్పుడు షాక్‌కి గురయ్యా. ఈ పాత్రని నేను చేయగలనా? అనే సందేహం కూడా వచ్చింది. కానీ దర్శకుడే నన్ను నమ్మి, చేయగలవంటూ ధైర్యం చెప్పారు’’.
• ‘‘ఇందులో ఒక బస్తీలో పుట్టి పెరిగిన అమ్మాయి పాత్రలో కనిపిస్తా. నేనూ బస్తీ అమ్మాయినే. మేం ఉండేది హైదరాబాద్‌లోని చాంద్రాయణగుట్టలో. కథ వింటున్నప్పుడు నా జీవితమే గుర్తొచ్చింది. ఈ సినిమాలోని ఏదో ఒక అంశం ప్రతి ప్రేక్షకుడికీ కనెక్ట్‌ అయ్యేలా ఉంటుంది. రెండు కోణాల్లో సాగే పాత్రలో కనిపిస్తాను’’.
• ఇదీ చదవండి: ఖలేజా టైటిల్‌.. అత్యాశకు పోయి రూ.10లక్షలు పోగొట్టుకున్నారు!
• ‘‘ఈ సినిమాలోని చాలా సన్నివేశాలు లోతుగా ఉంటాయి. వాటిని చేసేటప్పుడు అటూఇటూ కాకుండా చేయాలి. అందుకోసం నేను, ఆనంద్‌ దేవరకొండ, విరాజ్‌ ముగ్గురం కలిసి మాట్లాడుకుని సిద్ధమయ్యేవాళ్లం. ఆ ఇద్దరూ చక్కటి సహకారం అందించారు.
• ‘బేబి’ అనే పేరు ఈ సినిమాకి ఎందుకు పెట్టామనేది కూడా ఓ సన్నివేశంలో ఉంటుంది. ఇది సంగీత ప్రధానంగా సాగే సినిమా. సంగీత దర్శకుడు విజయ్‌ బుల్గానిన్‌తో ఇదివరకు ఓ ఆల్బమ్‌ కోసం పనిచేశా’’.
• ‘‘కథానాయికగా తెలుగమ్మాయిలకి అవకాశాలు ఇవ్వరనే ప్రచారం ఎందుకు వచ్చిందో తెలియదు. ఆ ప్రచారంవల్లే చాలా మంది సినిమాలకి దూరంగా ఉంటున్నారు. ప్రయత్నిస్తే తప్పకుండా అవకాశం వస్తుంది. నటనకి ప్రాధాన్యం ఉందంటే ఆ పాత్ర గ్లామర్‌గా ఉందా, డీ గ్లామర్‌గా ఉందా అనే విషయాన్ని అస్సలు పట్టించుకోను’’.