Kiara Advani: ‘పెళ్లి తేదీ ప్రకటిస్తారా?’.. కియారా పోస్ట్‌పై నెటిజన్ల ప్రశ్నలు

ఇంటర్నెట్‌ డెస్క్‌: సినిమా వాళ్లు సోషల్‌ మీడియాలో ఏదైనా పోస్ట్‌ పెడితే చాలు ఎవరికి ఇష్టం వచ్చినట్టు వారు కామెంట్‌ చేస్తారు. తారలు అసలు విషయం చెప్పేలోపే ‘జరిగేది ఇదే’ అంటూ కొందరు జోస్యం చెబుతుంటారు. బాలీవుడ్‌ నటి కియారా అడ్వాణీ (Kiara Advani) విషయంలో ఇదే పరిస్థితి కనిపిస్తోంది. ఆమె ఓ నటుడితో ప్రేమలో ఉందంటూ కొన్నాళ్లుగా ఊహాగానాలు వినిపిస్తున్న సంగతి తెలిసిందే. తమ అనుబంధం గురించి క్లారిటీ ఇవ్వని కియారా ఇన్‌స్టాగ్రామ్‌ వేదికగా అందరి దృష్టినీ ఆకర్షించేలా చేసింది. తన ఫొటోషూట్‌కు సంబంధించిన క్లిప్పింగ్‌ను పంచుకుంటూ ‘‘దీన్ని ఎక్కువకాలం రహస్యంగా ఉంచాలనుకోవట్లేదు. త్వరలో తెలుస్తుంది.. చూస్తుండండి.. డిసెంబరు 2న’’ అని పేర్కొంది.

ఆమె ఏ విషయం గురించి అలా పెట్టిందోగాని పలువురు నెటిజన్లు పెళ్లి ప్రస్తావన తీసుకొచ్చారు. ‘మీ పెళ్లి తేదీ ప్రకటిస్తారా?’, ‘క్రష్‌తో మీ వివాహం ఎప్పుడు ఖరారైంది?’, ‘ఊహించినట్టే పెళ్లి కబురు వినిపిస్తారా?’ అంటూ కామెంట్లు పెడుతున్నారు. లక్షల లైక్స్‌ సొంతం చేసుకున్న కియారా పోస్ట్‌ నెట్టింట వైరల్‌గా మారింది. మరి, కియారా ఏ రహస్యాన్ని బహిర్గతం చేస్తుందో తెలియాలంటే కొన్ని రోజులు ఆగాల్సిందే. మహేశ్‌బాబు హీరోగా తెరకెక్కిన ‘భరత్‌ అనే నేను’ సినిమాతో టాలీవుడ్‌లోకి ఎంట్రీ ఇచ్చింది కియారా. ఆ తర్వాత రామ్‌చరణ్‌ సినిమా ‘వినయ విధేయ రామ’లో కనిపించారు. మరోసారి ఆయనతో కలిసి #RC15 (వర్కింగ్‌ టైటిల్‌)లో నటిస్తున్నారు. ప్రముఖ దర్శకుడు శంకర్‌ ఈ చిత్రాన్ని తెరకెక్కిస్తున్నారు.