మాతృభాష విషయంలో ‘తానా’ కృషి అభినందనీయం: మన్నవ సుబ్బారావు

ఇంటర్నెట్‌ డెస్క్‌: అమెరికాలోని మినియాపోలిస్‌లో తానా సంస్థ ఆధ్వర్యంలో ‘పాఠశాల.. మన తెలుగు మన పిల్లల కోసం’ కార్యక్రమాన్ని నిర్వహించారు. ఈ సందర్భంగా తెలుగు పాఠశాల పరీక్షలలో ఉత్తీర్ణులైన విద్యార్థులకు అతిథులు సర్టిఫికెట్లు అందజేశారు. తెలుగు పుస్తకాలను పంపిణీ చేశారు. తానా రీజనల్ కోఆర్డినేటర్ సాయి బొల్లినేని అధ్యక్షతన నిర్వహించిన ఈ కార్యక్రమంలో గుంటూరు మిర్చియార్డు మాజీ చైర్మన్ మన్నవ సుబ్బారావు ముఖ్య అతిథిగా హాజరయ్యారు. 

ఈ సందర్భంగా మన్నవ సుబ్బారావు మాట్లాడుతూ.. తెలుగు భాష తియ్యదనం, తెలుగుజాతి గొప్పతనాన్ని అమెరికాలో రుచి చూపించారన్నారు. భాషను భావితరాలకు అందజేసేందుకు తానా చేస్తున్న కృషి అభినందనీయం. భాషను చంపే తరంగా మనం మిగలకూడదు. ఇప్పటికే పాలకుల అనాలోచిత నిర్ణయాలు తెలుగుభాషకు శాపంగా మారాయి. కొన ఊపిరితో కొండెక్కుతున్న తెలుగు భాషను అమెరికాలోని తెలుగువారు బతికిస్తున్నారు. తమ మాతృభాషతో పాటు సంస్కృతి, సంప్రదాయాలను మరచిపోతే ఆ జాతి అంతరిస్తుంది. ఒక జాతి అస్తిత్వాన్ని, ప్రత్యేకతను చాటి చెప్పేది మాతృభాషేనన్న విషయాన్ని అందరూ గుర్తించాలన్నారు.  

సాయి బొల్లినేని మాట్లాడుతూ.. భాష ఒక సాంస్కృతిక వారధి. తరాల మధ్య అంతరం రాకుండా మాతృభాష కాపాడుతుంది. మాతృమూర్తిని, మాతృభాషను, మాతృదేశాన్ని మరువకూడదన్నారు. భాష మానవ సంబంధాలను పెంపొందించి సమాజాన్ని విడిపోకుండా కాపలా కాస్తుందని పేర్కొన్నారు.  

అనంతరం పిల్లలు తెలుగులో చక్కటి గేయాలు, పద్యాలు పాడి ప్రేక్షకులను అలరించారు. ఈ కార్యక్రమంలో తానా పాఠశాల కోఆర్డినేటర్ మాలెంపాటి నాగరాజు, అరవపల్లి వేదవ్యాస్ తదితరులు పాల్గొన్నారు.