కేసీఆర్‌ స్వార్థ రాజకీయాలతోనే సింగరేణి ఆగమాగం: ఈటల

ఈనాడు డిజిటల్‌, కొత్తగూడెం: సింగరేణి సంస్థకు గనులు దక్కక ఆగమవడానికి సీఎం కేసీఆర్‌ స్వార్థ రాజకీయాలే కారణమని భాజపా రాష్ట్ర ఎన్నికల నిర్వహణ కమిటీ ఛైర్మన్‌ ఈటల రాజేందర్‌ ఆరోపించారు. కొత్తగూడెంలో పార్టీ రాష్ట్ర కార్యవర్గ సభ్యుడు కేవీ రంగాకిరణ్‌ నివాసంలో, కొత్తగూడెంలోని భాజపా కార్యాలయంలో శనివారం ఏర్పాటు చేసిన విలేకరుల సమావేశాల్లో ఈటల మాట్లాడారు. ‘‘ఉపరితల గనుల(ఓసీ)తో తెలంగాణను బొందల గడ్డగా మార్చారంటూ ఉద్యమ సమయంలో పాలకులను దుయ్యబట్టిన కేసీఆర్‌.. ఇప్పుడు ఆ మాటే మరిచారు. ఓటమి భయంతోనే ప్రభుత్వం గుర్తింపు సంఘం ఎన్నికల జోలికి వెళ్లడం లేదు. పదవుల ఆశచూపి ఇతర పార్టీల నాయకులను భారాసలో చేర్చుకుంటున్నారు.  రాష్ట్రంలో 17 ఉద్యోగాల నోటిఫికేషన్లకు సంబంధించిన ప్రశ్నపత్రాలు లీకయ్యాయి. ఇంతకంటే అసమర్థ పాలన ఉంటుందా’’ అని ప్రశ్నించారు. సమావేశంలో భాజపా రాష్ట్ర కార్యదర్శి కుంజా సత్యవతి తదితరులు పాల్గొన్నారు.