ముందే తాయిలాలు.. ఓటరు కార్డుల ఆధారంగా పేర్లు సేకరించిన వాలంటీర్లు

సంక్రాంతి కానుక పేరుతో చీరల పంపిణీ

వినుకొండ, న్యూస్‌టుడే: ఎన్నికలు సమీపిస్తుండటంతో వైకాపా నాయకులు ఓటర్లను ఆకట్టుకునేందుకు రకరకాల తాయిలాలు ఎరవేస్తున్నారు. నాలుగేళ్లుగా పట్టించుకోని నేతలు ఎన్నికల ఏడాది పండగ పేరుతో కానుకలు పంపిణీ చేస్తున్నారు. పల్నాడు జిల్లా వినుకొండ నియోజకవర్గంలో..వాలంటీర్ల సాయంతో ఓటున్న మహిళలకు చీరలు పంచుతున్నారు. ముందుగా ఓటరు కార్డు ఆధారంగా పేర్లు సేకరించారు. వాటి ఆధారంగా సీఎం జగన్‌, ఎమ్మెల్యే బొల్లా బ్రహ్మనాయుడు ఫొటోలు ముద్రించిన కూపన్లు అందజేస్తున్నారు. బొల్లాపల్లి మండలంలోని వివిధ గ్రామాల్లో నాలుగు రోజులుగా సంక్రాంతి, నూతన సంవత్సర శుభాకాంక్షలు తెలుపుతూ కూపన్ల ఆధారంగా వైకాపా నేతల బొమ్మలున్న సంచితో పాటు చీరలు పంపిణీ చేస్తున్నారు. నియోజకవర్గంలో సుమారు లక్ష చీరలు పంచాలన్నది అధికార పార్టీ లక్ష్యంగా చెబుతున్నారు.