Akaay: అకాయ్‌.. కోహ్లి, అనుష్క కుమారుడి పేరుకు అర్థమేంటో తెలుసా?

దిల్లీ: రెండోసారి తల్లిదండ్రులైన సెలబ్రిటీ జంట విరాట్‌ కోహ్లి (Virat Kohli), అనుష్క శర్మ తమ బిడ్డకు అకాయ్‌గా (Akaay) నామకరణం చేశారు. ఈ పేరుకు అర్థం ఏంటని నెట్టింట తెగ చర్చ జరుగుతోంది. దీనిపై ఆ రంగంలో నిపుణులు రెండు రకాల అర్థాలను చెబుతున్నారు. సంస్కృతంలో ఈ పదానికి ‘అమరుడు’, ‘చిరంజీవుడు’ అనే అర్థం ఉందని వెల్లడించారు. అలాగే హిందీలో ‘కాయ్‌’ అంటే శరీరమని.. ‘అకాయ్‌’ అంటే భౌతిక శరీరానికి మించినవాడు అని వివరించారు. మరోవైపు టర్కీ భాషలో ఈ పదానికి ‘ప్రకాశిస్తున్న చంద్రుడు’ అనే అర్థం కూడా ఉందట. మరి విరుష్క జంట ఏ అర్థంలో తమ బిడ్డకు అకాయ్‌గా నామకరణం చేశారో అధికారికంగా వెల్లడించాల్సి ఉంది.    

ఈ నెల 15న అనుష్క (Anushka Sharma) మగబిడ్డకు జన్మనిచ్చిందని కోహ్లి మంగళవారం ఇన్‌స్టాగ్రామ్‌ పోస్ట్‌లో తెలిపాడు. వీరికి ఇప్పటికే మూడేళ్ల కుమార్తె వామిక ఉంది. ‘‘ఫిబ్రవరి 15న మా బాబు, వామిక తమ్ముడు అకాయ్‌ని ఈ ప్రపంచంలోకి ఆహ్వానించాం. ఈ విషయం అందరికీ చెప్పడానికి సంతోషిస్తున్నాం. ఈ అందమైన సమయంలో మీ ఆశీర్వాదాలు కావాలి. మా ఏకాంతాన్ని గౌరవించమని విజ్ఞప్తి చేస్తున్నాం’’ అని కోహ్లి చెప్పాడు. కోహ్లి వ్యక్తిగత కారణాలతో భారత్‌-ఇంగ్లాండ్‌ టెస్టు సిరీస్‌కు దూరమైన సంగతి తెలిసిందే. ఈ జంటకు ప్రముఖులు, అభిమానుల నుంచి అభినందనలు వెల్లువెత్తుతున్నాయి.