ఒత్తిడిలోనూ రోహిత్‌ మంచి నిర్ణయాలు

దిల్లీ: ఒత్తిడి సమయాల్లోనూ కెప్టెన్‌ రోహిత్‌ శర్మ మంచి నిర్ణయాలు తీసుకుంటాడని భారత మాజీ ఆల్‌రౌండర్‌ యువరాజ్‌ సింగ్‌ అన్నాడు. టీ20 ప్రపంచకప్‌లో భారత్‌కు రోహిత్‌ కీలకమవుతాడని తెలిపాడు. ‘‘పొట్టి కప్పులో రోహిత్‌ చాలా కీలకం. మనకు సమర్థుడైన సారథి ఉండాలి. ఒత్తిడిలోనూ మంచి నిర్ణయాలు తీసుకోవాలి. నిరుడు వన్డే ప్రపంచకప్‌ ఫైనల్లో ఓడినప్పుడు భారత్‌కు రోహిత్‌ కెప్టెన్‌. సారథిగా అతను అయిదు ఐపీఎల్‌ ట్రోఫీలు గెలిచాడు. భారత్‌కు రోహిత్‌ లాంటి నాయకుడే కావాలి. ఆటగాడిగా గొప్ప విజయాలు అందుకున్నా అతడి వ్యక్తిత్వంలో ఎలాంటి మార్పు గమనించలేదు. అదే అతడిలోని గొప్పతనం. రోహిత్‌ ప్రపంచకప్‌ అందుకుంటే చూడాలనుంది’’ అని యువీ పేర్కొన్నాడు.